Ինտերը վերջնական որոշում է կայացրել Մխիթարյանի ապագայի հարցում

Միլանի «Ինտերը» դիտարկում է թիմի կիսապաշտպան Հենրիխ Մխիթարյանին նոր պայմանագիր առաջարկելու տարբերակը։ Այս մասին հայտնում է Calciomercato-ն՝ հղում անելով FCInter1908-ին։

Հայ ֆուտբոլիստի գործող համաձայնագրի ժամկետն ավարտվում է այս տարվա հունիսին: Թեև կողմերը դեռ պաշտոնական բանակցություններ չեն սկսել, աղբյուրի փոխանցմամբ՝ ակումբի ղեկավարությունը փոխել է դիրքորոշումը և մտադիր չէ բաժանվել վետերան կիսապաշտպանից։

37-ամյա Մխիթարյանը «ներաձուրիի» այն հինգ առանցքային խաղացողներից է, որոնց պայմանագրի ժամկետը սպառվում է մրցաշրջանի վերջում (մյուսներն են՝ Ստեֆան դե Վրեյը, Ֆրանչեսկո Աչերբին, Մատեո Դարմիանը և Յան Զոմերը)։ Սակայն, եթե նշված ֆուտբոլիստների դեպքում միլանյան ակումբը հակված է չերկարաձգել համագործակցությունը, ապա Մխիթարյանի պարագայում իրավիճակն այլ է։

Նշվում է, որ թիմի գլխավոր մարզիչ Կրիստիան Կիվուն շարունակում է վստահել Հայաստանի հավաքականի նախկին ավագին։ Չնայած տարիքին՝ Մխիթարյանը մնում է թիմի կարևորագույն օղակներից մեկը։ Ընթացիկ մրցաշրջանում նա բոլոր մրցաշարերում մասնակցել է 22 հանդիպման՝ դառնալով 1 գոլի և 2 գոլային փոխանցման հեղինակ։

Ավելին՝ Armsport