Առողջապահության նախարարությանը 1 ամիս է պահանջվել նախարարի խոսքում վրիպակը հայտնաբերելու համար

«Առողջության իրավունք» իրավապաշտպան ՀԿ ղեկավար Անուշ Պողոսյանն իր ֆեյսբուքյան էջում տեղադրել է առողջապահության նախարարության պատասխանը ապահովագրության շրջանակում առողջապահական հիմնարկներ այցերի մասին հունվարի 15-ին կառավարության նիստում Անահիտ Ավանեսյանի հնչեցրած թվերի վերաբերյալ։

Ի՞նչ այց են կատարել 70 697 քաղաքացիները, որոնք ոչ ամբուլատոր են, ոչ՝ հիվանդանոցային․ Անուշ Պողոսյան

Անահիտ Ավանեսյանը 2026թ. հունվարի 15-ին կառավարության նիստում հայտարարել էր, որ ապահովագրության շրջանակում առողջապահական հիմնարկներ է այցելել 87 048 քաղաքացի, որոնցից 7 739-ը՝ ամբուլատոր, 8 612-ը՝ հիվանդանոցային այցեր են կատարել։ Անուշ Պողոսյանը դիմել էր նախարարությանը, խնդրելով պարզաբանել, թե ինչ այց են իրականացրել մնացած 70 697 քաղաքացիները։

Նախարարության պարզաբանման համաձայն, «առողջապահության նախարարի կողմից առողջության համընդհանուր ապահովագրության շրջանակներում այցերի տվյալների ներկայացման բանավոր խոսքում եղել է վրիպակ, 77397 այցի փոխարեն հնչել է 7739 այց»։

Անուշ Պողոսյանը հիշեցրել է, որ նախարարությունը մեկ ամիս ժամանակ էր խնդրել փաստացի այս վրիպակը հայտնաբերելու համար։

«Նախարարությունը մեկ ամիս ժամանակ խնդրեց՝ պատճառաբանելով, որ անհրաժեշտ է «ուսումնասիրել թվերը»։

Եվ ահա, այդ «խորը մասնագիտական վերլուծության» արդյունքում պարզվեց, որ նախարարը վարչապետին ներկայացրել է սխալ տվյալներ․ պարզապես շփոթվել է։

Սակայն իրավիճակի ամենաաբսուրդային մասը դեռ առջևում էր։

Ազգային ժողովում, նույն հարցին պատասխանելիս, նախարարը լուրջ դեմքով հայտարարեց, որ կան նաև այլ ծառայություններ՝ ցերեկային ստացիոնար, շտապ բուժօգնության կանչեր և այլն, ու նույնիսկ փորձեց հարցը ներկայացնել որպես անտեղի ու անհասկանալի։

Այսպիսով ստացվում է՝

Կառավարության նիստում ներկայացվում են սխալ թվեր, մեկ ամիս նախարարությունը «ուսումնասիրում է» սեփական նախարարի խոսքը, իսկ ԱԺ-ում նույն նախարարը պնդում է, որ ամեն ինչ ճիշտ է, պարզապես պատգամավորներն են «սխալ հարցեր տալիս»։

Սա այլևս ոչ թե վիճակագրական սխալ է, այլ պետական կառավարման լուրջ խնդիր, երբ առողջապահության ոլորտում թվերը չեն համապատասխանում իրականությանը, իսկ հակասությունները բացատրվում են ինքնավստահ հեգնանքով։

Առողջապահությունը փորձարարական հարթակ չէ, իսկ հանրությունը պարտավոր չէ հաշտվել «շփոթվել եմ»-ով», - գրել է Անուշ Պողոսյանը։