Երևանում 23-ամյա Այշաթ Բայմուրադովայի սպանության գործով կասկածյալներ են ՌԴ 2 քաղաքացիներ. Անունները հայտնի են

Չեչնիայից Երևան տեղափոխված 23-ամյա Այշաթ Բայմուրադովայի սպանության գործով կասկածյալներ են համարվում Ռուսաստանի Դաշնության երկու քաղաքացիներ՝ Կարինա Իմինովան և Սաիդ-Համզատ Բայսարովը։ Այս մասին NEWS.am-ին հայտնեցին Քննչական կոմիտեից։

Նշենք, որ BBC-ի ռուսական ծառայության հարցմանն ի պատասխան էլ կոմիտեից հայտնել են՝ Իմինովան և Բայսարովը գործել են «առայժմ չբացահայտված անձի ցուցումով»։ Գերատեսչությունը դեռևս 2025 թվականի դեկտեմբերին դիմել է Ռուսաստանին՝ քննությանը աջակցելու խնդրանքով, սակայն մինչ օրս պատասխան չի ստացել։ Քննության վարկածով՝ Բայմուրադովայի մահվան պատճառը եղել է խեղդամահությունը, թեև, ինչպես նշում է Քննչական կոմիտեն, դա միանշանակ հաստատել հնարավոր չէ։

Ըստ ՔԿ–ի՝ սպանվածի մարմնի վրա հայտնաբերվել են «արյունազեղումների մանր և խոշոր օջախներ՝ բութ առարկաների ազդեցության հետևանքով, ինչպես նաև մի քանի փոքր մակերեսային մաշկային վնասվածքներ դեմքի աջ հատվածում»։

Քննիչների կարծիքով՝ այդ վնասվածքները կարող էին առաջացած լինել «բարձր ջերմաստիճանի ազդեցությունից»։

Հիշեցնենք՝ Չեչնիայից Երևան տեղափոխված 23-ամյա Այշաթ Բայմուրադովան Երևանում անհետացել էր հոկտեմբերի 15-ին։ Նա հանդիպման էր գնացել Կարինա Իմինովայի հետ և չէր վերադարձել։

Մի քանի օր անց Բայմուրադովային հայտնաբերել էին մահացած։ Իմինովան երևում է այն տան անվտանգության տեսախցիկների արձանագրություններում, որտեղ սպանվել էր Բայմուրադովան։ Իրավապաշտպանների և լրագրողների տվյալներով, նրան ուղեկցել է չեչեն Սաիդ-Համզատ Բայսարովը։ Նա գործարար Ռուսլան Բայսարովի եղբորորդին է․ վերջինս երգչուհի Քրիստինա Օրբակայտեի կրտսեր որդու հայրն է, Չեչնիայի ղեկավար Ռամզան Կադիրովի մտերիմը։