Ունենք ստոր, ողորմելի իշխանություն, որոնք ոչ մեկի սրբությունը չեն հարգում. Ակցիայի մասնակից

Երևանում` նախագահական շենքի դիմաց այսօր՝ փետրվարի 3–ին, բողոքի ակցիա են անում զոհված զինծառայողների ծնողները, հարազատները և մի շարք այլ քաղաքացիներ։ Նրանք ՀՀ նախագահ Վահագն Խաչատուրյանից պահանջում են ներողություն խնդրել Դավոսում Իլհամ Ալիևին շնորհակալություն հայտնելու համար։

Բողոքի ակցիայի մասնակիցները նաև իրենց ձեռքերում պահում են «Մեր ցավը քո դիվանագիտությունը չէ», «Դավոսում՝ շնորհակալություն, Եռաբլուրում՝ պատասխան», «Ալիևին շնորհակալությունն իսկական ամոթ է» և այլ գրություններով պաստառներ։

6 երեխաների մայր Զեմֆիրա Հովսեփյանը լրագրողների հետ զրույցում ասաց. «Իսձ այստեղ է բերել հայրենիքիս նվաստացումը, ամոթը այն զոհված զինվորների ընտանիքների առաջ, այն խեղված ճակատագրերի, որոնք պատերազմին մասնակցեցին, ողջ մնացին, բայց ոչ ողջ են, ոչ մեռած են, այն զինվորականների, որ իրենց ամբողջ կյանքը, իրենք իրենց երեխաների մեծանալը չեն տեսել, չեն իմացել հանգիստ քնելն ինչ բան է, երբ սրանց նման ստահակները իրենց կանանց ու սիրունիներին գրկել, քնել են, այդ մարդկանցքունը եղել է ցեխերի մեջ, իսկ այսօր այդ մարդկանց բոլորին նվաստացրել է, բոլորին գլխահակ է թողել։ Դա ամոթ է յուրաքանչյուր հային։ Ես որպես ՀՀ քաղաքացի որևիցե իշխանության իրավունք չեմ տալիս հայտարարություն անելու, եթե նրանք ստահակ են, ծախված են, եթե նրանք չունեն սրբություն, չգիտեն ինչ բան է մեծին հարգել, փոքրին հարգել, ցավին ցավակից լինել, հերոսին հարգել, ուրեմն իրավունք չունեն իմ անունից խոսելու։

Ավելին, եթե իրենք դրսերում կայֆավատ լինելով ապրել են, ես իմ երկրից մի քայլ այն կողմ չեմ գնացել, գիտակցաբար երեխաներ եմ բերել, որ որպես մայր պատասխանս թշնամուն տամ, որ հայի ընտանիքը աճելու է, հայի տունը լիքն է լինելու, երբեք հայը չի ծնկելու։ Իսկ այսօր ամբողջ աշխարհով թասիբով հայերը գլխահարկ են, որովհետև ունենք ստոր, ողորմելի, ոչնչություն, ուխտադրուժ, ուրացող իշխանություններ, որոնք ոչ մեկի սրբությունը չեն հարգում։

Այսօր ունենք անհետ կորած, զոհված հոգևորականներ, ունենք գերիներ Բաքվի բանտերում, ունենք սրբազան հայրեր բանտերում, որոնց տեռորիստ են ասում, առանց գետինը մտնելու եկեղեցի են պառակտում, եկեղեցին են ուզում գլխատեն, որպեսզի մեզ լրիվ անտեր թողնեն։

Արցախն էր խանգարում, Արցախը հանձնեց, սփյուռքն է խանգարում, սփյուռքից էլ է հրաժարվում, որ մեզ լրիվ անտեր թողնի։ Նպատակը մեկն է՝ Հայաստանը հանձնել սկուտեղի վրա թշնամուն»։

Նշենք, որ հունվարի 20–ին Դավոսում «Եվրասիայի տնտեսական ինքնության սահմանումը» թեմայով պանելային քննարկման ժամանակ ՀՀ նախագահ Վահագն Խաչատուրյանը հայտարարել է, որ Հայաստանի և Ադրբեջանի միջև խաղաղության գործընթացը հաջողություն կունենա, որովհետև երկու երկրներն էլ առաջ են նայում, իսկ եթե հետ նայեն ու փորձեն գտնել հակամարտության պատճառները, դա կզրկի այսօր ստեղծված հնարավորություններից։ Խաչատուրյանն իր ելույթի ընթացքում նաև շնորհակալություն հայտնեց Հայաստանի և Ադրբեջանի ղեկավարներին դրսևորած քաղաքական կամքի համար։

NEWS.am