Վագիֆ Խաչատրյանը հիվանդանոցից դուրս է գրվել

Հունվարի 14-ին ադրբեջանական գերությունից վերադարձած և հունվարի 22-ին վիրահատության ենթարկված Վագիֆ Խաչատրյանը դուրս է գրվել հիվանդանոցից։

Վագիֆ Խաչատրյանի դուստրը՝ Վերա Խաչատրյանը, 168.am-ին փոխանցեց, որ հայրիկի վիճակը բժիշկները բավարար են գնահատում։

«Հայրս հիվանդանոցից դուրս է գրվել ուրբաթ օրը՝ հունվարի 30-ին, այս պահին տանն է, առողջական վիճակը բավարար է։

Այս պահին հետվիրահատական վերականգնողական շրջանում է։ Կարողանում է մեզ հետ խոսել, շփվել, բայց այնպես չէ, որ շատ լավ է»,- նշեց Վերա Խաչատրյանը։

Հիշեցնենք, որ 2023 թվականի հուլիսին Հակարիի կամրջից ադրբեջանական կողմն առևանգել էր Արցախի Հանրապետության քաղաքացի Վագիֆ Խաչատրյանին։ Նա Կարմիր խաչի միջոցով Երևան էր գալիս սրտի վիրահատության նպատակով՝ աղջկա ուղեկցությամբ։

Առևանգելուց հետո Վագիֆ Խաչատրյանին տարել էին անհայտ ուղղությամբ, այնուհետև ադրբեջանական կողմը հայտարարել էր, որ նրան Բաքվում մեղադրանք է առաջադրվել, իբրև թե «ցեղասպանություն» իրականացնելու համար։

Ամիսներ տևած կեղծ դատավարական նիստերից հետո Բաքվի դատարանը որոշում էր կայացրել Վագիֆ Խաչատրյանին դատապարտել 15 տարվա ազատազրկման, որից 5 տարին պետք է անցկացներ բանտում, իսկ մնացածը՝ խիստ ռեժիմի գաղութում։

Հիշեցնենք նաև, որ հունվարի 14-ին Նիկոլ Փաշինյանը ֆեյսբուքյան իր էջում գրառում էր կատարել՝ հայտնելով, որ Բաքվում ապօրինի պահվող Գևորգ Սուջյանը, Դավիթ Դավթյանը, Վիգեն Էուլջեքջյանը և Վագիֆ Խաչատրյանը Հակարիի կամրջով Ադրբեջանի համապատասխան մարմինների ներկայացուցիչների կողմից հանձնվել են Հայաստանի Հանրապետության համապատասխան մարմինների ներկայացուցիչներին։ Այս գրառումից մոտ մեկ ժամ անց Արդարադատության նախարարությունը հաղորդագրություն տարածեց, նշելով, որ Հայաստանում ցմահ դատապարտված սիրիացի 2 վարձկանները Թուրքիայի միջոցով վերադարձվել են։