Դուք կարող եք ազատել Բաքվում պահվող բոլոր հայ քրիստոնյաներին․ Թաթոյանը դիմել է ԱՄՆ փոխնախագահին

«Միասնության թևեր» քաղաքական նախաձեռնության ղեկավար Արման Թաթոյանը 3 հարցով դիմել է ԱՄՆ փոխնախագահին` Հայաստան նախատեսված նրա այցի առիթով․

«ԱՄՆ հարգարժա՛ն փոխնախագահ Ջեյմս Դեյվիդ Վենս

«Հիլբիլիի էլեգիա․ ընտանիքի և ճգնաժամի մեջ գտնվող մշակույթի հուշագրություն» Ձեր հրաշալի գրքում Դուք Ձեր ժողովրդի մասին գրել եք. «Խորը հավատարմության զգացում, նվիրվածության անզիջում հավատարմություն ընտանիքին և հայրենիքին»։ Այս տողերը կարդալիս մտածում էի՝ Դուք կարող էիք գրել նաև հայերի մասին։

Թեև մեր ժողովուրդներին բաժանում են օվկիանոսներ, սակայն մենք ճանաչում և հասկանում ենք միմյանց։ Մենք գիտենք, թե ինչ է նշանակում պահպանել հավատը նույնիսկ այն ժամանակ, երբ ամեն ինչ քո դեմ է, և լիովին գիտակցում ենք ընտանիքի արժեքը։

Հենց սա է պատճառը, որ ես նամակով դիմում եմ Ձեզ։

Մենք բարձր ենք գնահատում և խորապես արժևորում Ձեր և նախագահ Թրամփի անցյալ գարնանը ձեռնարկած ջանքերը՝ Հայաստանի նկատմամբ նոր ագրեսիան կանխելու ուղղությամբ, որի արդյունքում ստորագրվեց «TRIPP»-ը։

Հայաստան կատարելիք առաջիկա այցի ժամանակ Ձեզ գուցե շատ բան կպատմեն, բայց ոչ այն առաջնային խնդիրների մասին, որոնք հուզում են մեր հասարակությանն իրապես։

Մեծ հարգանքով Ձեր նկատմամբ՝ ուզում եմ հիշեցնել՝

Ադրբեջանում անօրինական պահվող հայ գերիների և պատանդների, նրանց խոշտանգումների մասին։ Նրանք քրիստոնյաներ են, որոնց միակ «հանցանքը» նրանց հավատն ու ազգային ծագումն է։

Ադրբեջանը 2021 թվականից նաև օկուպացրել է Հայաստանի ավելի քան 200 քառ․ կմ տարածք, որի պատճառով մեր սահմանային բնակչությունը մշտական անհանգստության մեջ է, իսկ անվտանգությունը՝ խաթարված։

Մեր թիմն ունի նաև ապացույցներ՝ 2023 թվականի սեպտեմբերին Արցախի (Լեռնային Ղարաբաղ) նկատմամբ ադրբեջանական զինված ուժերի իրականացրած էթնիկ զտումների վերաբերյալ, որի հետևանքով ընդամենը մի քանի օրում իրենց դարավոր հայրենիքից բռնի տեղահանվեց 120,000 մարդ։

Պատրաստ ենք մեր կազմած հատուկ փաթեթները փոխանցելու Ձեր թիմին։ Դրանք կարող են օգտակար լինել Միացյալ Նահանգների քաղաքական դիրքորոշումը տարածաշրջանում ձևավորելու հարցում։

Դուք և նախագահ Թրամփն ունեք գործունեության բացառիկ հաջողակ փորձ։

Նախագահ Թրամփը վերադարձրեց գերիների, որոնք անգամ կորած էին համարվում։

Միասին դուք կանխեցիք Հայաստանի նկատմամբ ագրեսիան անցյալ գարնանը, երբ Բայդենի վարչակազմը նույնի համար որևէ քայլ չձեռնարկեց։ Սրանք ոչ թե խոսքեր են, այլ կոնկրետ արդյունքներ։ Եվ ամբողջ աշխարհի հայերը սա տեսնում ու հիշում են։

Մենք վստահ ենք, որ Ադրբեջան կատարելիք Ձեր այցի ընթացքում Դուք կարող եք ազատել Բաքվում պահվող բոլոր 19 հայ քրիստոնյա գերիներին ու պատանդներին։ Այս քայլը հազարավոր հայ ընտանիքներին կբերի հույս ու արդարություն և լայն արձագանք կստանա ամբողջ աշխարհի հայ համայնքում:

Հարատև խաղաղություն հաստատելու ԱՄՆ-ի ջանքերը նպատակին կհասնեն, երբ Ադրբեջանը դուրս գա Հայաստանի օկուպացված տարածքներից, ինչպես նաև վերականգնվեն բռնի տեղահանված հարյուր հազարից ավելի քրիստոնյա հայերի բնական իրավունքները։

Մեր ժողովրդի համար նախագահ Թրամփի և Ձեր այս ջանքերը կդառնան հերոսական, և Ձեր անունները հավերժ կմնան մեր պատմության էջերում։

Համոզված եմ, որ մեր երկու ազատասեր ժողովուրդների դաշինքը՝ հանուն խաղաղության, բարօրության և հավատքի պահպանման, կարող են բացել նոր դարաշրջան Կովկասում և ամբողջ տարածաշրջանում։

Հայաստանը պատրաստ է լինել այդ ապագայի մաս՝ ոչ որպես խնդրող, այլ որպես լիիրավ գործընկեր։

Ձեր տատիկն ասում էր․ «Աստված օգնում է նրանց, ովքեր օգնում են իրենք իրենց»։ Մենք հենց այդպես էլ անում ենք՝ օգնում ենք ինքներս մեզ և համոզված ենք, որ Աստված մեզ ուղարկել է ընկերներ։

Մեծ ակնկալիքով սպասում ենք Ձեր առաջիկա այցին Հայաստան և տարածաշրջան»: