Երկրորդ նախագահն առաջարկում է մոդել, որը թույլ չի տա որևէ քաղաքական ուժի մենաշնորհ ունենալ պետական կառավարման համակարգում. Բենիամին Մաթևոսյան

«Alphanews.am» տեղեկատվական ցանցի վերլուծաբան Բենիամին Մաթևոսյանը գրում է. «ՀՀ երկրորդ նախագահ Ռոբերտ Քոչարյանի երեկվա ասուլիսի հիմնական ուղերձներից մեկը սահմանադրական բարեփոխումների անհրաժեշտության մասին հայտարարությունն էր։ Քոչարյանը չի խոսում պարզապես «ցուցանակի» փոփոխության մասին։ Նրա քննադատություն թիրախն առկա Սահմանադրությամբ ձևավորված համակարգն է, որը ծնել է «սուպերվարչապետությունը» և ինստիտուտների կախվածությունը մեկ մարդու կամքից։
Երկրորդ նախագահն առաջարկում է ոչ թե «մեխանիկական վերադարձ անցյալին», այլ անցում ներառական պետական գործընկերության մոդելին։ Դրա էությունն այն է, որ ներկայիս «հաղթողը ստանում է ամեն ինչ» մոդելը պետք է փոխվի։ Հայաստանին անհրաժեշտ է մի համակարգ, որտեղ կոալիցիոն կառավարումը ոչ թե հարկադրված միջոց է, այլ ներկառուցված մեխանիզմ, որը թույլ չի տա որևէ քաղաքական ուժի (կամ անհատի) մենաշնորհ ունենալ պետական կառավարման համակարգում։
Սա գործընկերային իշխանության առաջարկ է, որտեղ առանցքային որոշումներն անցնում են լայն փորձագիտական և քաղաքական կոնսենսուսի զտիչով, ինչը կենսական նշանակություն ունի էկզիստենցիալ ռիսկի մեջ գտնվող մեր երկրի համար։
Հ.Գ. Միայն քմծիծաղ է առաջացնում ՔՊ-ականների վախը թուրքական ֆեոդալի նկատմամբ։ Իրոք շատ հետաքրքիր է, ՔՊ-ականները չե՞ն հասկանում, որ Արարատի հիշատակումը չի նշանակում տարածքային պահանջ Թուրքիայի նկատմամբ, թե՞ իրենց ուղղակի վիրավորում է Արարատի պատկերի ցուցադրումը Հայաստանում ու իրենք կարծում են, որ դրա մենաշնորհն ունի միայն Թուրքիան»։