Դատապարտում ենք հայ ինքնությունը հանցավորության հետ կապող վտանգավոր հռետորաբանությունը. Հայ դատի հանձնախումբ

Հայ դատի Ամերիկայի Արևմտյան ափի հանձնախումբը խստորեն դատապարտում է «Medicare» և «Medicaid» Services կենտրոնների (CMS) ադմինիստրատոր Մեհմեթ Օզի կողմից վերջերս հնչեցված հայտարարություններն ու հրապարակված տեսանյութը, որոնցում Լոս Անջելես շրջանի ենթադրյալ առողջապահական խարդախությունները կապվում են «օտար ազդեցությունների» հետ, այդ թվում՝ «ռուսահայկական խմբավորումների», ինչպես նաև հայ ինքնության, լեզվի և համայնքային ներկայության ներկայացումը որպես հանցավորության ցուցիչ։

Հայ դատի Ամերիկայի Արևմտյան ափի հանձնախումբը ընդգծում է` խարդախությունը հանցագործություն է, և յուրաքանչյուր ապացուցված խախտում պետք է քննվի ու պատժվի օրենքի գերակայության շրջանակում՝ անկախ անձի ծագումից։ Սակայն օրենքի գերակայությունը պահանջում է անհատական կասկած և ապացույցներ, այլ ոչ թե ակնարկներ կամ ենթադրություններ՝ հիմնված լեզվի, մշակույթի կամ էթնիկական պատկանելության վրա։

«Հանրային պաշտոնյաները պարտավոր են պահպանել Սահմանադրության թե՛ տառը, թե՛ ոգին», — հայտարարել է Հայ դատի Ամերիկայի Արևմտյան ափի հանձնախմբի նախագահ Օշին Հարութունյանը` հավելելով․ «Երբ իրավապահ հռետորաբանությունը շեղվում է դեպի էթնիկական ընդհանրացումներ, դա վտանգում է քաղաքացիական իրավունքները և ամբողջ համայնքները։ Ամերիկահայերը, ինչպես բոլոր ամերիկացիները, արժանի են օրենքի առջև հավասար արդարադատության»։

Հայ դատի Ամերիկայի Արևմտյան ափի հանձնախումբը, նշում է․ «Ամերիկահայերի համար՝ Հայոց ցեղասպանության ժառանգությունն ու մեկ դարից ավելի շարունակվող ժխտման փորձերը հաշվի առնելով՝ նման հռետորաբանությունը պարզապես խոսք չէ, այլ վտանգավոր պատմական օրինաչափությունների կրկնություն։ Առանձնահատուկ մտահոգիչ է, որ այս ուղերձները հնչում են դաշնային պաշտոնյայի՝ հանրային առողջապահական ծրագրերի պաշտպանության համար պատասխանատուի կողմից։

Հայ դատի Ամերիկայի Արևմտյան ափի հանձնախումբը զգուշացնում է, որ այսպիսի ձևակերպումները փաստացի վերածվում են հանրայնորեն տարածվող ատելության խոսքի՝ խրախուսելով ամերիկահայ բիզնեսների և մասնագետների նկատմամբ հետապնդումները և հիմք ստեղծելով խտրական իրավապահ գործելակերպի համար։

Հայ դատի Ամերիկայի Արևմտյան ափի հանձնախումբը կոչ է անում Օզին և CMS-ին՝

անհապաղ հետ վերցնել և ուղղել այն հռետորաբանությունը, որը ենթադրյալ խարդախությունը կապում է հայկական ինքնության, լեզվի կամ մշակույթի հետ,
ապահովել, որ բոլոր քննությունները լինեն խիստ ապացույցների վրա հիմնված և ոչ խտրական,
հրաժարվել համայնքների նկատմամբ հավաքական մեղադրանքից
համագործակցել համայնքային կառույցների հետ՝ վստահությունը վերականգնելու և քաղաքացիական իրավունքների լիարժեք պաշտպանությունն ապահովելու համար։
Հանձնախումբը վերահաստատում է. հայ ամերիկացիները Միացյալ Նահանգների և Կալիֆոռնիայի հպարտ ու արժանապատիվ քաղաքացիներ են։ Կառավարական հաղորդակցությունը, որը խթանում է հայատյացությունը կամ վտանգի տակ է դնում համայնքի անվտանգությունը, անընդունելի է։

Հայ դատի Ամերիկայի Արևմտյան ափի հանձնախումբը պատրաստ է աջակցել խիստ, օրինական և արդար պայքարին ընդդեմ խարդախությունը՝ միաժամանակ պաշտպանելով քաղաքացիական և մարդու իրավունքները բոլոր համայնքների համար։

Հանձնախումբը նաև նշում է՝ Կոնգրեսի բազմաթիվ անդամներ հետևողականորեն հանդես են եկել ամերիկահայերի և այլ փոքրամասնությունների դեմ ուղղված ատելության խոսքի, էթնիկական թիրախպավորման և խտրականության դեմ։ Այդ հայտարարություններն ու գործողությունները ընդգծում են երկկուսակցական ակնկալիքը, որ դաշնային իրավապահ գործունեությունը մնա ապացույցների վրա հիմնված և լիովին համապատասխան քաղաքացիական իրավունքների պաշտպանության պահանջներին։