Իրանի նկատմամբ անվստահություն ձևավորելը շատ ծանր է նստելու մեզ վրա. Ռոբերտ Քոչարյան

«Ինձ ամենից շատը մտահոգում են Իրանի հետ սահմանի հանգամանքը և վերջերես իրանական կողմից հնչած հայտարարությունները։ ԱՄՆ–ի համար այս տարածաշրջանը, իսկապես, ամենից կարևորը չէ, բայց Իրանի նկատմամբ, հավանական է, որ նոր ռազմական գործողությունների հեռանկար ունի։ Երեկ ԱՄՆ նախագահը կրկին բավական կտրուկ հայտարարություն է արել։ Հարևանի հետ հարաբերությունները փչացնելուց հետո դժվար է դրանք վերականգնելը։ Կենցաղում էլ է այդպես»։ Այս մասին այսօր՝ հունվարի 29-ին կայացած ասուլիսի ժամանակ ասաց ՀՀ 2-րդ նախագահ Ռոբերտ Քոչարյանը՝ մանրամասնելով, թե ինչ նկատի ուներ, երբ նշեց, որ TRIPP-ը Հայաստանի անվտանգային ամենամեծ սպառնալիքն է դառնալու։

«Խոսքն այն մասին է, որ աշխարհագրությունը ոչ թե խնդիր, այլ առավելություն պետք է դառնա։ Հարևան երկրի նկատմամբ, որը ամենածանր պայմաններում քո կողքին է եղել, անվստահության մթնոլորտ ձևավորելը շատ ծանր է նստելու։ Չի կարելի այսօր քայլեր անել, որոնցով Իրանի հետ հարաբերություններում անվստահություն ես մտցնելու։ Ես իրավունք ունեմ սա ասելու, որովհետև հիշում եմ՝ երբ մենք գազամուղ էինք կառուցում, Միացյալ նահանգներից մեզ փորձում էին խանգարել։ Բայց նստել, բանակցել, նկարել ենք, հաշվարկ ենք արել և համաձայնել։ Նույնիսկ այն ժամանակ առաջարկել եմ երեք երկրներով միասին ստեղծել այդ գազամուղը։ Սկզբում ասացին կմտածենք, հետո ասացին, որ չեն կարող մասնակցել նախագծին, բայց մեր մտահոգությունները հասկանում են և խնդիր չեն ստեղծելու: ԱՄՆ–ի հետ հնարավոր է նստել որևէ ծրագրի շուրջ բանակցել, բայց ոչ ոք դա չի արել։ Նիկոլ Փաշինյանն ուրախացել է, որ գնացել է Թրամփի հետ նկարվի, իրեն նկար էր պետք ընտրությունների համար։ Բանակցելու համար ժամանակ է պետք, կարող է բանակցեին՝ օգոստոսի 8-ին չստորագրեին, սեպտեմբերի 8-ին ստորագրեին։ Համբերություն չունի այս մարդը, որ նստեն, աշխատեն, նորմալ տարբերակի գալ»,–հավելեց Քոչարյանը։

news.am