Իմ օրոք չի եղել որևէ տարաձայնություն Եկեղեցու հետ. Պարբերաբար հանդիպել եմ Վեհափառի հետ. Քոչարյան

Ենթադրվում է, որ յուրաքանչյուր արժանապատվություն ունեցող դատավոր երազում է ունենալ այնպիսի արդարադատության համակարգ, որի մասին ես խոսեցի, որ ինքը մեկ մարդու քմահաճույքից կախված չլինի։ Այս մասին, այսօր՝ հունվարի 29–ին, մամուլի ասուլիսի ժամանակ նշեց ՀՀ երկրորդ նախագահ Ռոբերտ Քոչարյանը։

«Սա ռեալ առաջարկ է, որը ներառելու ենք մեր նախընտրական ծրագրում։ Դատավորի համար ամենակարևոր հանգամանքը իր անկախությունն է»,–ասաց նա։

Հարցին՝ ունեցե՞լ է տարաձայնություններ Վեհափառի հետ և ունեցե՞լ է ցանկություն, որ մեկ ուրիշը դառնա կաթողիկոս, Ռոբերտ Քոչարյանը պատասխանեց. «Պարբերաբար հանդիպել ենք Վեհափառի հետ իմ նախագահության ժամանակ։ Որևէ մեկին փոխելու, կամ մտնելու ինչ–որ պատմությունների մեջ ոչ թե չի եղել, այլ եթե մեկն ինձ ասեր, որ գալու է մի պահ և մենք ունենալու ենք այս պատկերը, ես կասեի՝ հոգեկան հիվանդ է հարց տվողը։

Իմ ժամանակ ամենամեծ ծավալի եկեղեցաշինությունն է եղել Հայաստանում։ Բարբերաբար քննարկել ենք, բայց երբեք չի եղել քննարկում, որը կարող էր փոխադարձ անվստահության մթնոլորտ ձեւավորեր։ Հակառակը, միշտ ասում էի՝ ինչ է պետք, ինչով կարող եմ օգնել։ Ես ասում էի՝ լավ է, որ նոր եկեղեցիներ են կառուցվում, բայց պատմական մեր կեղեցիների վրա մի քիչ ավելի շատ ուշադրություն դարձրեք։

Մեր տարածաշրջանում, փոքր երկրի համար ազգային ինքնությունը այն ցեմենտն է, որը այդ պետականությունն ամուր է պահում։ Եթե ուզում ես պետականությունը քանդվի, այդ ինքնությունը թուլացրու։ Սա աքսիոմատիկ մոտեցում է և ես չէի կարող ուրիշ կարգի հարաբերություններ ձևավորել եկեղեցու հետ։ Չի եղել որևէ տարաձայնություն»։