«Դուք թուրքին տեսնելուց ժպտացողներն եք, զոհվածի մորը Եռաբլուրով քարշ տվողները, սիրելուց էլ միայն ձեր աթոռն եք սիրում». Ռուբեն Մխիթարյանը՝ իշխանություններին

Հանրային գործիչ, Գյումրու ավագանու անդամ Ռուբեն Մխիթարյանը իշխանություններին է դիմել. «Միայն ձեր աթոռն եք սիրում: Դրանով հանդերձ էլ դուրս եք թռչելու»։

«Դուք նահատակներին ու անհետ կորածներին պլյուս մինուսով հաշվողներն եք:

Դուք ռազմադաշտում վայրագություններ անողներին և արցախցիներին տնավեր անողներին շնորհակալություն հայտնողներն եք:

Դուք թուրքին տեսնելուց ժպտացողներն ու ձեզ թուրք համարողներն եք:

Դուք պատերազմ բերողներն ու խայտառակ պարտվողներն եք:

Դուք դրսում կուզեկուզ քայլողներն, իսկ ներսում՝ շիրիմներ տրորողներն եք:

Դուք զոհվածի մորը Եռաբլուրով քարշ տվողներն ու «մերոնցական-ձերոնցական» զոհվածի ծնող բաժանողներն եք:

Դուք գերիներին ձեր շահի համար հերոսացնողն ու հերոսին բանտերում մեռցնողներն եք:

Դուք հայերին «սևերի» ու «սպիտակների» տարանջատողներն եք:

Որքան ուզում եք՝ «սրտիկ» ցույց տվեք: Անսիրտ մարդիկ եք: Սիրելուց էլ միայն ձեր աթոռն եք սիրում: Դրանով հանդերձ էլ դուրս եք թռչելու»,- ընդգծել է Մխիթարյանը։