Արագածոտնում խոշոր վթարից վիրավորվածներից 4–ը Թալին ԲԿ–ում են. Երևան տեղափոխվածներից մեկի վիճակը ծանր է

Տարբեր վնասվածքներ են ստացել, հիմնականում պոլի տրավմաներ. Բավականից ծանր է անցել օրը, բավականին դիմելիություններ, մի մասը Երևան է տեղափոխվել, մի մասը այստեղ են ու ներկա պահին էլ շարունակում ենք սպասարկել բուժառուներին։ Այս մասին NEWS.am–ի հետ զրույցում նշեցին Թալինի բժշկական կենտրոնից՝ անդրադառնալով այսօր՝ հունվարի 27–ին, Թալին-Բազմաբերդ ավտոճանապարհին տեղի ունեցած շղթայական վթարից տուժածներին։

«Ներկա պահին չորս բուժառու ունենք, բոլորը չափահաս են։ Կյանքին վտանգ սպառնացող վիճակ ներկա պահին մեզ մոտ չունենք։

Իմ տեղեկություններով կա Երևան տեղափոխված բավականին ծանր վիրավորում ստացած քաղաքացի»,–ասացին հիվանդանոցից։

Ավելի վաղ NEWS.am–ը հայտնել էր, որ այսօր՝ հունվարի 27-ին, Երևան-Գյումրի ավտոճանապարհի 51-55-րդ կմ-երի հատվածում տեղի են ունեցել ավտովթարներ․ բախվել է ընդհանուր 15 ավտոմեքենաներ։ Մինչ փրկարարների կանչի վայր հասնելը՝ երկու քաղաքացի տեղափոխվել է բժշկական կենտրոն, որտեղ նրանց առողջական վիճակը գնահատվել է բավարար։

Փրկարարները հատուկ տեխնիկյի օգնությամբ 2 քաղաքացու դուրս են բերել «Ford» մակնիշի ավտոմեքենաներից, մոտեցրել շտապօգնության մեքենային և կատարել ճանապարհի լվացման աշխատանքներ։

Շտապօգնության ծառայության Արագածոտնի մարզային կայանի բրիգադներն այսօր առավոտից աշխատում են գերծանրաբեռնված՝ բուժօգնություն տրամադրելով Թալին-Բազմաբերդ ավտոճանապարհին տեղի ունեցած շղթայական վթարից տուժածներին։

Առողջապահության նախարար Անահիտ Ավանեսյանն իր հերթին հայտնել է, որ 10 քաղաքացի հոսպիտալացվել է. հիմա բուժզննման փուլում են, կան ծանր դեպքեր: