Վրաստանում ձերբակալել են առողջապահության նախկին փոխնախարարին

Վրաստանի առողջապահության նախկին փոխնախարար Իլյա Գուդուշաուրին ձերբակալվել է ծառայողական լիազորությունները չարաշահելու համար։ Այս մասին տեղեկացրել է Վրաստանի ֆինանսների նախարարության Քննչական ծառայությունը։

Տեղեկացվել է, որ Գուդուշաուրին, որը նաեւ գլխավորել է առողջապահության նախարարության մրցութային տենդերների հանձնաժողովը, ազդել է տենդերի արդյունքների վրա, որը նախարարությունը հայտարարել էր 2022թ. սեպտեմբերին շտապօգնության մեքենաներ գնելու համար։ Տենդերին մասնակցել են երեք ընկերություններ, որի հաղթող է դարձել դրանցից մեկը, որն առաջարկել է գնման ամենացածր գինը՝ 8,5 մլն լարի (մոտ 3,2 մլն դոլար)։ Սակայն այդ տենդերը ընդհատվել է Գուդուշաուրիի ցուցմամբ, եւ հայտարարվել է նորը 2023թ. մայիսին։ Նոր տենդերի պայմանները հարմար էին միայն մեկ կոնկրետ ընկերության, արդյունքում՝ մյուս հավակնորդները չեն մասնակցել։

Տենդերում հաղթանակի համար նախապես որոշված ընկերությանը նախարարությունն անհիմն կերպով վճարել է 2,1 մլն լարի ( 794, 9 հազար դոլար)՝ վնաս պատճառելով պետության շահերին։ Քննությունը վարվում է պաշտոնատար անձի կողմից ծառայողական պարտականությունների չարաշահման հոդվածով։