Աննա Վարդապետյանը պարգևատրել է ինքն իրեն խոշոր գումարով

ՀՀ գլխավոր դատախազի խորհրդական Լուսինե Մարտիրոսյանը, տեղի տալով NEWS.am լրատվական գործակալության հորդորին, հրապարակել է գլխավոր դատախազ Աննա Վարդապետյանի՝ դեկտեմբեր ամսին ստացած պարգևավճարի չափը: Դատախազության ներկայացուցիչը հայտնել է, որ ՀՀ գլխավոր դատախազը 2025 թվականի դեկտեմբերին որպես պարգևավճար ստացել է ընդամենը 1 միլիոն 894 հազար 300 դրամ:

Այսպիսով ստացվում է, որ ՀՀ գլխավոր դատախազ Աննա Վարդապետյանը 2025 թվականի դեկտեմբերին 1 միլիոն 894 հազար 300 դրամ աշխատավարձից, դասային աստիճանի համար տրվող հավելավճարից, հավելումից, նախորդ կիսամյակի կատարողականի հիման վրա պետբյուջեի հաշվին ստացած գումարից զատ՝ ինքն իրեն պարգևատրել է նաև 1 միլիոն 894 հազար 300 դրամ գումարով:

Այս դեպքում գործ ունենք դատախազության պատմության՝ մինչ օրս հայտնի դարձած ամենախոշոր ինքնապարգևատրման և պարգևատրման հետ:

Դատախազի խորհրդականը, սակայն, այդպես էլ չի հայտնել, թե դեկտեմբերին ընդհանուր առմամբ որքան հավելավճար, հավելում, ինչպես նաև 2025 թվականի 1-ին կիսամյակի գործունեության առաջնահերթությունների և դրանց կատարողականի արդյունքային ցուցանիշների հիման վրա պարգևատրման շրջանակներում որքան լրացուցիչ գումար է ստացել գլխավոր դատախազը:

Հիշեցնենք, որ NEWS.am-ը դեռևս 2025 թվականի դեկտեմբերի 29-ին գրավոր հարցմամբ դիմել էր գլխավոր դատախազությանը և հետաքրքրվել, թե որքա՞ն գումար է հատկացվել դատախազության աշխատակիցների դրամական խրախուսման համար, ինչպես նաև որքա՞ն է կազմել դեկտեմբերին գլխավոր դատախազի և տեղակալների ստացած պարգևավճարների չափը (խնդրել էինք հայտնել առանձին-առանձին): Գրավոր հարցումը մակագրվել էր գլխավոր դատախազի խորհրդական Լուսինե Մարտիրոսյանին: Հարցմանը պատասխանելու համար դատախազությունից նախ լրացուցիչ ժամանակ էին խնդրել, հետո միայն 25 օր անց, կոնկրետ հարցադրումներին պատասխանելու փոխարեն, մանիպուլյատիվ պատասխաններ են տվել՝ հիմք տալով լրատվամիջոցին ինքնուրույն հաշվարկել և հետևություններ անել դեկտեմբերին գլխավոր դատախազի և նրա տեղակալների ստացած աշխատավարձերի, պարգևավճարների և լրացուցիչ այլ վճարների վերաբերյալ:

«Պետական պաշտոններ և պետական ծառայության պաշտոններ զբաղեցնող անձանց վարձատրության մասին» ՀՀ օրենքով սահմանված դրույքաչափերի, դասային աստիճանի համար տրվող հավելավճարների և հավելումների հաշվարկը, ինչպես նաև 15.0 դրույքաչափով աշխատող գլխավոր դատախազի ապահոված «կատարողականի» հիման վրա արված համեմատությունը թույլ է տալիս ենթադրելու, որ գլխավոր դատախազ Աննա Վարդապետյանը դեկտեմբերին հնարավոր է ստացել է մինչև 8 մլն դրամի աշխատավարձ, հավելավճար և պարգևավճար, իսկ նրա տեղակալները՝ մինչև 3 մլն դրամի աշխատավարձ, հավելավճար և պարգևավճար:

Ի դեպ, նախորդ հրապարակումից հետո ֆեյսբուքյան օգտատերերի մի մասը պաշտպանել էր Աննա Վարդապետյանին՝ արձանագրելով, որ վերջինս «արժանի է նման չափի պարգևավճարների», իսկ որոշներն էլ նկատել էին, որ «արդար չէ նախկինների թալանը վերադարձնել և բաժանել իրար մեջ»:

Հաշվի առնելով ՀՀ Սահմանադրությամբ և «Տեղեկատվության ազատության մասին» օրենքով ամրագրված տեղեկատվություն ստանալու իրավունքը, ինչպես նաև թափանցիկության ու հաշվետվողականության կարևորագույն սկզբունքները՝ դատախազությանը վերստին հորդորում ենք հաշվարկներում առկա հնարավոր անճշտությունների դեպքում հրապարակել դեկտեմբերին գլխավոր դատախազի և նրա տեղակալների ստացած աշխատավարձերի, հավելավճարների, հավելումների և պարգևավճարների վերաբերյալ լրիվ և ամբողջական տեղեկատվություն: