Հայաստանում հեղուկի փոխարեն վաճառվող տեխնիկական գազն անորակ է՝ ոչնչացման ենթակա

Վերջին շրջանում շատ են ահազանգերը, որ որոշ գազալցակայաններ ավտոմեքենաներում լցնում են կենցաղային (տեխնիկական) գազ։ Վարորդները նկատել են, որ մեքենան նույն քանակությամբ գազով ավելի քիչ ճանապարհ է անցնում։

ՀՀ շուկայի վերահսկողության տեսչական մարմնի ղեկավար Արմեն Կոտոլյանը հայտնել է, որ օրենքով կենցաղային գազը մեքենաներում օգտագործելը չի արգելվում։ Նա նշել է, որ անցած տարի ստուգվել է 67 գազալցակայան, որոնցից 37-ում արձանագրվել են խախտումներ, իսկ ընդհանուր խախտումների տոկոսը կազմում է 55,2%։ Կոտոլյանը պարզաբանել է, որ կենցաղային գազով լիցքավորելու դեպքում մեքենան նույն գումարով ավելի քիչ կիլոմետր է անցնում, ինչը պայմանավորված է գազի որակական ցուցանիշներով։

Oragir.News-ի հետ զրույցում այս հայտարարությանը անդրադարձել է «Իրազեկ և պաշտպանված սպառող» ՀԿ նախագահ Բաբկեն Պիպոյանը։

«Ես չեմ ցանկանում մեկնաբանել պետական կառույցի գոյությունն արդարացնող տեքստերը, քանի որ դրանք չեն բխում սպառողների շահերից: Օրինակ՝ ՀՀ շուկայի վերահսկողության տեսչական մարմնի ղեկավար Արմեն Կոտոլյանը հայտարարում է, թե բենզինի ստուգման արդյունքում հայտնաբերվել է «շատ չնչին» անհամապատասխանություն: Որպես մասնագետ՝ պնդում եմ, որ «չնչին անհամապատասխանություն» իրավական հասկացություն գոյություն չունի. ապրանքը կա՛մ համապատասխանում է սահմանված նորմերին, կա՛մ ոչ,:

Եթե արձանագրվել է անհամապատասխանություն, ապա այդ վառելիքը ենթակա չէր իրացման: Հարց է առաջանում՝ ինչո՞ւ հանրային իրազեկում չի իրականացվել, ինչո՞ւ ապրանքը չի ոչնչացվել և ինչո՞ւ սպառողներին հնարավորություն չի տրվել փոխհատուցում պահանջել տնտեսվարողից: Փաստացի, պետությունն արձանագրել է, որ սպառողին վաճառվել է անորակ ապրանք, սակայն պատշաճ հետևանքներ չեն կիրառվել»,- պարզաբանեց Պիպոյանը։

Նկատենք, որ կենցաղային գազով լիցքավորված ավտոմեքենան ոչ միայն ավելի քիչ կիլոմետր է անցնում, այլև երկարաժամկետ օգտագործման դեպքում կարող են առաջանալ մեխանիկական խնդիրներ։

Եվ չնայած օրենքը թույլատրում է կենցաղային գազի օգտագործումը ավտոմեքենաներում, սակայն ըստ փորձագետների և վարորդների՝ այն փաստացի անորակ է, ոչնչացման ենթակա։ Պետությունը պետք է պաշտպանի սպառողի իրավունքները և պարտավորեցնի գազալցակայաններին ապահովելու ճշգրիտ տեղեկատվություն վաճառվող գազի որակի և ռիսկերի վերաբերյալ։