Պետք է Ջեյ Դի Վենսի այցի ընթացքում բարձրացնել մեր ռազմագերիների և Արցախի ռազմաքաղաքական ղեկավարության ազատարձակման հարցը. Արմեն Աշոտյան

Արմեն Աշոտյանը գրում է. «Հայտնի դարձավ, որ ԱՄՆ փոխնախագահը փետրվարին այցելելու է ոչ միայն Հայաստան, այլեւ Ադրբեջան։

Այս պահին դնում եմ մի կողմ Երեւան եւ Բաքու կատարվելիք այցերի օրակարգերի ասիմետրիան, թեպետ դա էլ ձախողված արտաքին քաղաքականության արդյունք է։

Կարծում եմ, պետք է մաքսիմալ լարել հայկական ներուժը եւ հարց բարձրացնել այդ այցի ընթացքում Բաքվում պահվող մեր ռազմագերիների եւ Արցախի ռազմաքաղաքական ղեկավարության ազատարձակման մասին։

ԱՄՆ նախագահի հատուկ բանագնացին ամիսներ առաջ հաջողվել էր Մինսկում հասնել մի քանի տասնյակ բելառուս քաղբանտարկյալների ազատությանը։

Նույն սցենարը հնարավոր է ինչպես Ալիեւի, այնպես էլ Փաշինյանի դեպքում։

Ադրբեջանում՝ քրիստոնյա հայերի, իսկ Հայաստանում՝ առնվազն հոգեւոր սպասավորների իրավունքների պաշտպանությունը տեղավորվում է թե Վենսի անձնական, թե Թրամպի վարչակազմի աշխարհայացքի մեջ։

Մնում է մենք՝ Հայաստանում եւ Սփյուռքում, նպատակային աշխատենք այս ուղղությամբ։

Վստահ եմ՝ կարող ենք կապիտալիզացնել Վենսի այցը մեր հայրենակիցների ազատության տեսքով»: