Վալոդյա Գրիգորյանի սպանության գործ. պաշտպանը միջնորդեց երկու մեղադրյալների առերեսում կազմակերպել

Վարույթն իրականացնող մարմնի կողմից համակողմանի լրիվ և օբյեկտիվ քննություն կատարելու կապակցությամբ հանձնարարությունների բացակայությունը, անբացատրելիորեն շուտափույթ և հարճեպ քննության իրականացումը, մեղադրական եզրակացության կազմումն ու հաստատումը հիմքեր են տալիս եզրահանգելու, որ սույն քրեական վարույթով որպես հանրային մեղադրող, իսկ նախաքննության ընթացքում որպես հսկող դատախազ հանդես եկող պարոն Շահբազյանը անաչառ չի եղել գործով ճշմարտությունը բացահայտելու, անձանց արարքներին օբյեկտիվ քրեաիրավական գնահատական տալու հարցում։ Այս մասին, այսօր՝ հունվարի 23–ին, Փարաքարի համայնքապետ Վալոդյա Գրիգորյանի սպանության գործի քննության ժամանակ հայտարարեց մեղադրյալ Նարեկ Օհանյանի պաշտպան Վահան Հովհաննիսյանը։

Նկատելով, որ այս քրեական վարույթը ունի հասարակական մեծ հնչեղություն, գտնվել և գտնվում է հանրության ուշադրության կենտրոնում, հանրային և սոցիալական տարբեր հարթակներում քննարկվել և քննարկվում են բազմաթիվ վարկածներ, նա նշեց. «Մասնավորապես բազմաթիվ անձինք, քաղաքական և հանրային գործիչներ կարծիքներ են հայտնել սպանությունը պատվիրված լինելու, պատվիրատուներին չհայտնաբերելու, սպանությունը Վոլոդյա Գրիգորյանի պաշտոնական դիրքով, վերջինիս քաղաքական գործունեության շարժառիթով կատարված լինելու վերաբերյալ։

Պետք է իրականացվեր բազմակողմանի, ամբողջական և օբյեկտիվ քննություն, պարզելու վերոգրյալ հանգամանքների առկայությունը կամ բացակայությունը, սակայն քրեական վարույթի ուսումնասիրումը հիմք է տալիս արձանագրելու, որ այդ կապակցությամբ վարույթն իրականացնող մարմնի կողմից առաջ չի քաշվել և ոչ մի վարկած, չի կատարվել և ոչ մի քննչական կամ ապացուցողական գործողություն, չի կայացվել և ոչ մի դատավարական որոշում։

Վարույթ իրականացնող մարմինը ի սկզբանե առաջ է քաշել մեկ վարկած՝ վրեժի շարժառիթով սպանությունը, նշանակել է երկու մեղավոր և հետագա ողջ քննությունը իրականացրել բացառապես այդ մեկ վարկածի շուրջ։ Հսկող դատախազի կողմից չի տրվել քննության համակողմանի էությունը ապահովելու որևէ հանձնարարություն»,–ասաց նա։

Այսինքն, անկախ ցանկացած հանգամանքից, քննիչն ու դատախազը նախաքննության հենց առաջին օրվանից ընդունել են միայն մեկ վարկած՝ վրեժի շարժառիթով սպանությունը և առանց որևէ փաստական հիմքի ստուգման բացառել մնացած բոլոր շարժառիթներն ու վարկածները։

Դեպքից հետո շուրջ երեք օր իրավական համակարգը խարխափել է, պարզելու համար, թե ինչ շարժառիթով է կատարվել սպանությունը, ով է կատարել սպանությունը, բայց առաջին օրվանից, երբ դեռ պարզ չի սպանությունը ինչ շարժառիթով է կատարվել, ով է կատարել, առաջ է քաշվում վարկած, որ սա վենդետայի արդյունք է, կատարվել է անձնական վրեժի շարժառիթով»,–ասաց մեղադրյալի պաշտպանը՝ հավելելով, որ վարույթ իրականացնող մարմինը նպատակ է հետապնդել հանրային դժգոհության ալիքը մեղմելու, տուժողներին հաճոյանալու նպատակով օր առաջ քրեական վարույթ ուղարկել դատարան՝ անկախ նրանից՝ գործը բացահայտված է, թե ոչ։

Վահան Հովհաննիօսյանը միջնորդեց, որպեսզի իրականացվի առերես հարցաքննությունՆարեկ Օհանյանի և մյուս մեղադրյալ Գևորգ Հարությունյանի միջև, քանի որ նրանց ցուցմունքներում կան լուրջ հակասություններ. «Մասնավորապես բենզինի շշի ձեռք բերման և Նարեկ Օհանյանի կիսակառույց տան բակում գտնվելու մասով։

Առերեսման իմ միջնորդությունը մերժվում է, որովհետեւ, իմ կարծիքով, վարույթ իրականացնող մարմինը և հսկող դատախազը կարող էին, առնվազն, ենթադրել, որ առերեսման ընթացքում, օրինակ, Գևորգ Հարությունյանին տրվող մի քանի հարցով հնարավոր է՝ ձեռք բերվեին այնպիսի փաստական տվյալներ, որոնք հերքեին Նարեկ Օհանյանի մեղավորությունը և հանգեցնեին քրեական հետապնդման դադարեցմանը։ Իրենց համար այդ անցանկալի հետևանքից խուսափելու նպատակով առերեսումը չկատարվեց»։

Հիշեցնենք, որ սեպտեմբերի 23-ին՝ ժամը 23։52-ի սահմաններում, Մերձավան բնակավայրի Երևանյան խճուղում՝ իր նորակառույց տան մոտ սպանվել է Փարաքարի համայնքապետ Վալոդյա Գրիգորյանը։ Նրա հետ միասին սպանվել է քրեական ոստիկանության ծառայող Կարեն Աբրահամյանը, որը Գրիգորյանի ընկերն է ու դեպքի պահին նրա հետ է եղել՝ ոչ ծառայության հետ կապված։ Վիրավորում ստացած քաղաքացին, որը ծայրահեղ ծանր վիճակում էր գտնվում, Արծրուն Գալստյանն է։ Սպանություն կատարած անձը եղել է դիմակավորված և ձեռնոցներով, մոտեցել է տան մոտ կանգնած Գրիգորյանին և նրա ընկերներին, դիմահար կրակահերթ արձակել։

Դեպքի առթիվ Արմավիրի մարզային քննչական վարչության Վաղարշապատի քննչական բաժնում ՀՀ քրեական օրենսգրքի 155-րդ հոդվածի 1-ին մասի (2 դրվագ) (սպանություն), 44-155-րդ հոդվածի 1-ին մասի (սպանության փորձ) և 335-րդ հոդվածի 1-ին մասի (հրազենի, դրա հիմնական բաղկացուցիչ մասերի, ռազմամթերքի և այլ նյութերի, սարքերի, առարկաների ապօրինի շրջանառությունը) հատկանիշներով նախաձեռնվել է քրեական վարույթ։ Այս գործով այժմ երկու մեղադրյալ կա՝ 31-ամյա Նարեկ Օհանյանը և 20-ամյա Գևորգ Հարությունյանը, նրանք երկուսն էլ կալանքի տակ են։

NEWS.am