«Հրապարակ». Տասնյակ նախկին զինվորականներ դատի են տվել ՊՆ-ին

2025-ին տասնյակ քաղաքացիներ դիմել են Վարչական դատարան՝ ընդդեմ պաշտպանության նախարարության։ Նրանք նախկին զինվորականներ են, որոնք երկար տարիներ ծառայել են ՊՆ-ում, պետությունը պարտավորություն է ունեցել նրանց բնակարան հատկացնելու, բայց չի հատկացրել: Նրանք տարիներով մնացել են ՊՆ-ի ցուցակում՝ այդպես էլ բնակարան չստանալով։ Նախկին զինվորականների հայցերում պահանջը ձեւակերպված է այսպես․ «ՀՀ պետական բյուջեի միջոցների հաշվին բնակարան ձեռք բերելու համար հայցվորին հասանելիք բնակարանի գնին համարժեք/բնակարանի արժեքի 100 տոկոսի չափով/անհատույց ֆինանսական աջակցություն տրամադրելու վերաբերյալ հրաման ընդունելուն պարտավորեցնելու պահանջի մասին»։

Հայցվորների շահերը դատարանում ներկայացնում է փաստաբան Նորիկ Նորիկյանը։ Նա մեզ հետ զրույցում նշեց․ «Մի քանի հայցեր ունեմ, որոնք նախկին զինվորականներ են ներկայացրել՝ պահեստազորում հաշվառված։ Իրենք տարիներ շարունակ հաշվառված են եղել բնակարանային պայմանների բարելավման հերթացուցակում ու երբ չեն ստացել, դիմել են դատարան՝ դատական պաշտպանության միջոցով պարտավորեցնել նախարարությանը՝ ֆինանսական աջակցություն տրամադրել՝ իրենց բնակարանային պայմանների բարելավման խնդիրը լուծելու նպատակով՝ նոր բնակարան ձեռք բերելու համար։ Իրենք երբ դարձել են զինվորական, գործող կարգավորումներով, զինվորական ծառայության ընթացքում, եթե ունեն բնակարանային պայմանների բարելավման կարիք, ներկայացնում են համապատասխան փաստաթղթերը եւ ըստ տարիների ստանում են։ Կառավարության 2007 թվականի թիվ 384 որոշմամբ սահմանվում եւ կարգավորվում է, որ ֆինանսական աջակցություն տրամադրելու օրվա դրությամբ կադաստրային վերջին 3 ամսվա շուկայական արժեքի մոտարկված թվով է փոխհատուցվում»։

- Դատարանն ի՞նչ որոշում է կայացնում` բավարարո՞ւմ է, թե՞ մերժում հայցերը։

- Բավարարվում են, դրանք այնպիսի պահանջներ են, որ բավարարվում են։ Եթե իրենք հաշվառված են եւ այս տարիների ընթացքում չեն վատթարացրել կամ բարելավել իրենց բնակարանային պայմանները, այսինքն՝ վերջին 5 տարվա ընթացքում ձեռք չեն բերել կամ չեն օտարել, մնում են բնակարանային պայմանների հերթացուցակում, միանշանակ, այդ հայցերը բավարարվում են։ Ինչպե՞ս կարող է պետությունը զինծառայողի հետ պայմանագիր կնքել, վերջինս 20 տարի ծառայի, հաշվառվի, եւ հետո ասի՝ չէ, ես հետ եմ կանգնում իմ պայմանից։ Հասկանո՞ւմ եք՝ չի լինի այդպես։ 

- Պատասխանող կողմի առարկությունները որո՞նք են։

- Առարկություններ լինում են ժամկետների մասով, ֆինանսական հնարավորությունների, կարողությունների մասով։

 «Հրապարակ օրաթերթ»