Ցավոք հակառակը ստացվեց․ Հանուն Հայաստան պետության ճակատի ուղերձը
Հայ ժողովուրդն արժանի է ունենալու այն պետությունը, որն ուրվագծվել է Անկախության հռչակագրով: Այս մասին հայտարարություն է տարածել «Հիմնադիր խորհրդարանի» անդամ Ժիրայր Սեֆիլյանի կոչով ստեղծված Հանուն Հայաստան Պետության ճակատը: Ճակատի ամանորյա ուղերձում ասվում է. «Հայ ժողովուրդը 1990 թվականին ընդունված Անկախության Հռչակագրով ի լուր աշխարհի հայտարարեց Հայաստանի և Արցախի տարածքների վրա ազատ, անկախ, ինքնիշխան պետության կառուցելու իր կամքի մասին: Հռչակագիրն ազատ, անկախ, ինքնիշխան հզոր պետության կառուցման հիմքերը դնելու մեր դարավոր երազանքների խտացումն էր, պետություն, որտեղ տիրելու էր համաժողովրդական համաձայնությամբ ընդունված, իշխանությունների ու ժողովրդի համերաշխ գործունեությունը ապահովող հիմնական օրենքը՝ Սահմանադրությունը: Պետություն, որտեղ իշխանությունները կկազմավորվեին բացառապես ժողովրդի ազատ կամքով և կգործեին համաձայն սահմանադրության ու օրենքների, հանուն ժողովրդի բարեկեցության, պետության և ժողովրդի անվտանգության, հանուն հզորացման ու առաջընթացի: Պետություն, որը կլիներ այս աշխարհում հայի համար ապահով ու արժանապատիվ ապրելու ամենահարմարավետ վայրը: Ցավոք, ստացվեց ճիշտ հակառակը: Անկախության հռչակումից, Արցախյան պատերազմի հաղթանակից ի վեր Հայաստանի Հանրապետության իշխանությունները, ներդնելով ոչ ժողովրդավարական, ոչ լեգիտիմ սահմանադրությամբ հաստատված պետական կառավարման ապակառուցողական համակարգ, հետևողականորեն ոչնչացնելով հանրային և անհատական ազատությունները, սոցիալական արդարությունը, իսկ արտաքին հարաբերությունների, տնտեսական, այժմ արդեն նաև ռազմական ուղղություններում համարյա ամբողջովին զիջելով ինքնիշխանությունը օտարին, արդեն իսկ Հայաստանը կանգնեցրել են գաղութացման, պետության վերջնական կործանման շեմին: Ծայրահեղ աղքատությունը, անարդարությունները, անկախ, արդարադատ դատական համակարգի բացակայությունը, համատարած թալանն ու կոռուպցիան, մարդու ազատ ապրելու և արարելու միջավայրի աստիճանական վերացումն իրար հաջորդող ոչ օրինակարգ իշխանությունների կողմից հանգեցրել են զանգվածային արտագաղթի: Չնվազող արտագաղթն իրական սպառնալիք է Հայոց պետության գոյության համար, որն էլ ի վերջո կհանգեցնի վերջնական հայրենազրկման: Այդ ամենի դեմն առնելու հայ հանրության ցանկացած ընդվզում բարբարոսաբար ճնշվում է օտարածին իշխանությունների կողմից՝ բանտերը լցնելով ապօրինի դատապարտված նորանոր քաղբանտարկյալներով: Այսօր էլ ընթանում են քաղաքական դատավարություններ՝ նախօրոք գծված սցենարներով ու արդեն նախապես պատվիրված դատավճիռներով: Առջևում Նոր տարին է, և Նոր տարում մարդկանց մեջ ծնվում են նոր ակնկալիքներ, ապագայի հանդեպ նոր հույսեր, նոր սպասումներ: ՀՀՊ ճակատն ընդունել է հռչակագիր, որով տրվում են առկա խնդիրների լուծման և ծառացած մարտահրավերների դեմն առնելու բանալին: Եվ ՀՀՊ ճակատը գործադրելու է ամեն ջանք՝ միավորելու հասարակությանը, վերարթնացնելու լավ ապագայի հույսը, սեփական ուժերի նկատմամբ սասանված հավատը: Համոզված ենք, որ այս վտանգները քաջ գիտակցում է նաև հայկական սփյուռքն իր ամբողջության մեջ: Եվ Հայաստանի հանրությունը միայն սփյուռքի առարկայական աջակցությամբ կկարողանա դեպի անէություն տանող այս գաղութացման ընթացքի դեմն առնել: Վստահ ենք, որ մեր ժողովուրդն արժանի է ունենալու այն պետությունը, որն ուրվագծվել է Անկախության հռչակագրով: Եվ միայն ազատ ու արդար, հարուստ ու հզոր պետությունում է հնարավոր, որ իրականանան առողջության, երջանկության, բարեկեցության, արժանապատիվ կյանքի, լիքը զավակներով սեղան նստելու, առատ սեղանների, անհոգ ու ուրախ օրերի, առանց քաղհալածյալների, կայուն ու համերաշխ, արդար հասարակություն ունենալու ամանորյա բարեմաղթանքները: Եվ մեր միասնական կամքի ձևավորմամբ ու միասնական ջանքերով կհասնենք ազատ, անկախ, արդար, հզոր, ինքնիշխան պետություն կերտելուն՝ ինտեգրվելով առաջադեմ պետությունների միջազգային ընտանիքին: Շնորհավոր բոլորիս Նոր տարին:
Հետևեք մեզ Viber-ում
