Երևանում Չինաստանի քաղաքացուն մահվան ելքով վրաերթի ենթարկելու դեպքը բացահայտվել է

Հունվարի 11-ին ՀՀ քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժնի ավագ քննիչ Ավետիք Թովմասյանը միջնորդություն է ներկայացրել Երևան քաղաքի քրեական դատարան, որպեսզի դատարանը որպես խափանման միջոց երկամսյա կալանքի որոշում կայացնի Երևանի բնակիչ 27-ամյա Մ. Օսիպովի նկատմամբ։

Ինչպես հայտնում է ֆոտոլրագրող Գագիկ Շամշյանը, վերջինը կասկածվում է հունվարի 8-ին ոչ սթափ վիճակում, առանց վարորդական իրավունքի վկայական ունենալու, Արցախի փողոցում Չինաստանի Հանրապետության քաղաքացուհուն մահվան ելքով վրաերթի ենթարկելու և դեպքի վայրը լքելու մեջ։

Դատարանը դռնփակ դատական նիստն անցկացնելուց հետո, դատավորը խորհրդակվական սենյակից վերադառնալով բավարարում է քննիչի միջնորդությունը և Մ. Օսիպովը դատարանից տեղափոխվում է ՀՀ Արդարադատության նախարարության քրեակատարողական ծառայության «Արմավիր» քրեակատարողական հիմնարկ։

Ֆոտոլրագրողը հայտնում է, որ դեռ վրաերթի օրը Մ. Օսիպովի հետ է լինում նաև Երևանի բնակիչ 39-ամյա Ա. Գաիջյանը և դեպքի օրը ՊԾ Երևան քաղաքի գնդի 3-րդ գումարտակի պարեկներն ու ՊԾ Երևան քաղաքի գնդի հետախուզական խմբի պարեկները ավտոմեքենան հայտնաբերել էին վրաերթի վայրից մոտ 1.5-2 կմ հեռավորության վրա և նշված անձինք դրսում կանգնած փորձել էին մոլորեցնել պարեկներին՝ ասելով, որ իրենք ուղղակի կանգնած են, բայց դա նրանց չէր հաջողվել։

Նշված անձինք ձերբակալվել և տեղափոխվել էին ոստիկանության Էրեբունու բաժին։Ֆոտոլրագրողի տեղեկություններով՝ Մ. Օսիպովի նկատմամբ դատարանը նախկինում 2 անգամ որոշումներ է կայացրել, քանի որ 2 անգամ էլ լինով ոչ սթափ ու չունենալով ավտոմեքենա վարելու իրավունք, ավտոմեքենա է վարել։ Ինչպես ասում են՝ «Կարմիր կովն իր կաշին չի փոխի», ու քննիչների և պարեկների գրագետ աշխատանքի շնորհիվ ու փաստերի ճնշման տակ է, որ իրական վարորդը բացահայտվել է։