Նարեկ Սամսոնյանի առողջական վիճակի վերաբերյալ շրջանառվող տեղեկությունները խորապես մտահոգիչ և վտանգավոր են․ Անուշ Պողոսյան

Առողջության իրավունք ՀԿ-ի նախագահ Անուշ Պողոսյանը ֆեյսբուքյան իր էջում գրում է․

Ուղղված՝ ՀՀ առողջապահության նախարար Անահիտ Ավանեսյանին․
Քաղբանտարկյալ Նարեկ Սամսոնյանը գտնվում է հացադուլի մեջ, իսկ նրա առողջական վիճակի վերաբերյալ շրջանառվող տեղեկությունները խորապես մտահոգիչ և վտանգավոր են։ Խոսքը այլևս ոչ թե հերթական հանրային քննարկման թեմայի, այլ կոնկրետ մարդու կյանքի և առողջության անմիջական վտանգի մասին է։
Այս իրավիճակը վաղուց արդեն դուրս է եկել քաղաքական հարթությունից և վերածվել է մաքուր մարդասիրական, բժշկական և իրավական պատասխանատվության հարցի։

ՀՀ առողջապահության նախարարությունը չի կարող սահմանափակվել լռությամբ կամ ձևական արձագանքներով, երբ առկա է հիմնավոր մտահոգություն, որ կալանավորված անձի առողջության իրավունքը կարող է խախտվել, իսկ նրա կյանքը՝ հայտնվել անմիջական վտանգի տակ։

ՀՀ Սահմանադրությունը, միջազգային կոնվենցիաները և բժշկական էթիկայի հիմնարար սկզբունքները պետության վրա դնում են հստակ պարտավորություն՝

ապահովել յուրաքանչյուր անձի՝ անկախ նրա կարգավիճակից կամ հայացքներից՝ կյանքի իրավունքի պաշտպանություն,
առողջության իրավունքի լիարժեք ապահովում,
անկախ և մասնագիտական բժշկական գնահատում,
ժամանակին և պատշաճ բժշկական օգնություն։

Եթե քաղբանտարկյալ Նարեկ Սամսոնյանը ստիպված է սեփական կյանքի գնով բարձրաձայնել իր, և ոչ միայն իր նկատմամբ իրականացվող ապօրինությունների մասին, ապա դա արդեն իսկ վկայում է պետական համակարգի խորքային ձախողման մասին։

Բժշկությունը չի կարող ծառայել քաղաքական հարմարավետությանը։

Մարդու կյանքը չի կարող դառնալ լռության, անգործության կամ անտարբերության զոհ։

Հասարակությունն ունի լիարժեք իրավունք իմանալ՝
ինչ է իրականում տեղի ունենում Նարեկ Սամսոնյանի առողջության հետ, ինչ քայլեր են ձեռնարկվել,
և արդյոք պետությունը կատարում է իր նվազագույն պարտականությունները։

Ձեր ուղղակի պարտականությունն է՝
անհապաղ ապահովել անկախ բժշկական գնահատում,
երաշխավորել պատշաճ բուժօգնություն և շարունակական բժշկական հսկողություն,և հանրությանը տրամադրել հստակ ու ճշգրիտ տեղեկատվություն։