Դատավոր Մանվել Շահվերդյանը Նարեկ Սամսոնյանի և Վազգեն Սաղաթելյանի կալանքի ժամկետը երկարաձգեց

Այսօր Երևանի քրեական դատարանի Ավան և Նորք-Մարաշ նստավայրում՝ դատավոր Մանվել Շահվերդյանի նախագահությամբ, մեկնարկում է ընդդիմադիր հասարակական գործիչներ, «Իմնեմնիմի» փոդքասթի հեղինակներ Նարեկ Սամսոնյանի և Վազգեն Սաղաթելյանի գործով դատական առաջին նիստը: Այս դատավարությունը ստացել է պայմանական «Իմնեմնիմի-2» անունը:

Հիշեցնենք, որ 2025թ. նոյեմբերի 13-ին Ազգային անվտանգության ծառայության (ԱԱԾ) աշխատակիցները ձերբակալեցին Antifake.am-ի «Իմնեմնիմի» քաղաքական փոդքասթի համահեղինակներ և վարողներ Վազգեն Սաղաթելյանին և Նարեկ Սամսոնյանին, ինչպես նաև Antifake.am-ի լրագրող Դավիթ Ֆիդանյանին, ով ավելի ուշ ազատ արձակվեց։ Ձերբակալություններն իրականացրել էին դիմակավորված ԱԱԾ աշխատակիցները, ովքեր նաև խուզարկություններ էին անցկացրել վերջիններիս բնակության վայրերում։ Միևնույն ժամանակ ԱԱԾ աշխատակիցները խուզարկել են Antifake.am-ի շենքը՝ առգրավելով տեխնիկական և լրագրողական սարքավորումներ՝ տեսախցիկներ, բարձրախոսներ, համակարգիչներ, շտատիվներ և տվյալների կրիչներ։

Քրեական գործը վերաբերում է փոդքասթի նոյեմբերի 8-ի թողարկման ընթացքում արված արտահայտություններին։ Իշխանությունները դրանք որակել են որպես «խմբակային խուլիգանություն՝ տեղեկատվական կամ հաղորդակցական տեխնոլոգիաների կիրառմամբ»։ Հաղորդավարների և նրանց իրավապաշտպանների խոսքով՝ այդ արտահայտությունները եղել են քաղաքական մեկնաբանություններ՝ ի պատասխան Ազգային ժողովի նախագահի նախկինում հնչեցրած հրապարակային վիրավորանքներին։ Իսկ Ազգային ժողովի խոսնակը հայտարարել է, որ թողարկումը նաև պարունակել է «սպառնալիքներ»։

Նոյեմբերի 14-ին դատարանը Սաղաթելյանի և Սամսոնյանի նկատմամբ կիրառեց երկամսյա նախնական կալանք օրինակ այն բանի համար, որ Վազգեն Սաղաթելյանը ուղիղ եթերում պատասխանել է Ալեն Սիմոնյանին, իսկ Նարեկ Սամսոնյանը օգտագործել է «հետույք» բառը:

Այսօրվա դատական նիստում պետք է քննվի Նարեկ Սամսոնյանի և Վազգեն Սաղաթելյանի խափանման միջոցների վերանայման հարցը: Դատարանը մեղադրյալների անձերի նույնականացումից հետո անցավ խափանման միջոցի հարցի քննությանը: Հանրային մեղադրող Հայկ Ավետյանը միջնորդեց կրկին 3 ամսով երկարաձգել տղաների կալանքի ժամկետը՝ պատճառաբանելով ազատության մեջ մնալու պարագայում նույն արարքը կատարելու ռիսկի առկայությունը: Պաշտպաններ Արսեն Բաբայանն ու Ռուբեն Մելիքյանը առարկեցին միջնորդության դեմ:

Այնուհետև դիրքորոշում հայտնեցին Նարեկ Սամսոնյանն ու Վազգեն Սաղաթելյանը: Նարեկ Սամսոնյանի խոսքի ժամանակ իրավիճակը դատական նիստերի դահլիճում լարվեց. Բուռն վեճի բռնվեցին Նարեկ Սամսոնյանն ու հանրային մեղադրող Հայկ Ավետյանը:

Ինչևէ, պաշտպանները միջնորդեցին վերացնել խափանման միջոց կալանքը, իսկ դրա անհնարինության դեպքում կիրառել ազատազրկման հետ չկապված խափանման միջոց:

Լսելով կողմերին՝ դատավոր Մանվել Շահվերդյանը որոշեց Նարեկ Սամսոնյանի և Վազգեն Սաղաթելյանի կալանքի ժամկետը երկարաձգել 3 ամսով:

Դատարանի որոշման մասին լսելով՝ Նարեկ Սամսոնյանը անժամկետ հացադուլ հայտարարեց:

Դատական նիստը շարունակվում է:

168.am