Ֆիլիպիններում Մայոն հրաբխի վտանգավորության մակարդակը բարձրացրել են երրորդի

Ֆիլիպինների հրաբխագիտության և սեյսմաբանության ազգային ինստիտուտը (Phivolcs) երեքշաբթի օրը Մայոն հրաբխի վտանգի մակարդակը երկրորդից բարձրացրել է երրորդի՝ լավային գմբեթի փլուզման պատճառով։ Ժայթքումը կարող է տեղի ունենալ առաջիկա օրերին կամ շաբաթներին, հայտնում է ֆիլիպինյան ABS-CBN պորտալը՝ հղում անելով Phivolcs-ին։

Phivolcs-ը հունվարի 1-ին Մայոն հրաբխի վտանգի մակարդակը բարձրացրել էր երկրորդ մակարդակի։ Սրա հետ կապված՝ Ֆիլիպինների քաղաքացիական ավիացիայի վարչությունը սահմանափակել էր հրաբխի շուրջ թռիչքների բարձրությունը։ Օդանավերի թռիչքները գագաթից 3,35 կիլոմետր շառավղով արգելվել եբ, իսկ օդաչուներին հորդորվել էրխուսափել հրաբխին մոտ թռչելուց, քանի որ հանկարծակի ֆրեատիկ (գոլորշային) ժայթքումներից առաջացած հրաբխային մոխիրը լուրջ սպառնալիք է ներկայացնում ինքնաթիռների համար։

«Ֆիլիպինների հրաբխագիտության և սեյսմաբանության ազգային ինստիտուտը (Phivolcs) երեքշաբթի օրը՝ հունվարի 6-ին, բարձրացրել է Մայոն հրաբխի վտանգի մակարդակը մինչև երրորդ մակարդակ՝ լավային գմբեթի փլուզման սկսվելու պատճառով», – նշված է ABS-CBN-ի նյութում։

Հրաբխի լավային գմբեթի ավերումը կարող է հանգեցնել պիրոկլաստիկ հոսքերի առաջացման, որոնք բարձր ջերմաստիճան (մինչև մի քանի հարյուր աստիճան ըստ Ցելսիուսի) ունեցող հրաբխային գազերի, մոխրի և ապարների բեկորների խառնուրդ են։ Նման հոսքերը չափազանց վտանգավոր են, քանի որ հրաբխի լանջերով իջնում են հսկայական արագությամբ՝ երբեմն ժամում մինչև հարյուրավոր կիլոմետր և իրենց ճանապարհին ոչնչացնում են ամեն ինչ։ Պիրոկլաստիկ հոսքերն ընդունակ են նաև հաղթահարել ջրային արգելքները և շարժվել լանջերով դեպի վեր։

Ինչպես նշվում է ABS-CBN-ի հաղորդագրության մեջ, Phivolcs-ն ընդգծել է, որ պայթյունը կարող է տեղի ունենալ առաջիկա շաբաթների կամ օրերի ընթացքում: Առկա է նաև մոխրի տեղումների հավանականություն: Ազգային ինստիտուտը գրանցել է հրաբխի շրջակայքում գրունտի բարձրացում, ինչը կարող է վկայել մագմայի և հիդրոթերմալ հեղուկների՝ դեպի մակերևույթ բարձրանալու մասին:

Ֆիլիպինյան Inquirer լրատվական պորտալը նույնպես նշել է, որ հրաբխի վտանգի երրորդ մակարդակը նշանակում է ժայթքման բարձր հավանականություն: Ըստ պորտալի տվյալների՝ գմբեթի փլուզման սկսվելու պատճառով վերջին մեկ օրվա ընթացքում Մայոն հրաբխի վրա տեղի է ունեցել քարաթափման 85 դեպք:

Տեղական իշխանությունները խստորեն հետևում են, որ քաղաքացիները չմտնեն հրաբխի մոտակայքում գտնվող վեց կիլոմետր շառավղով մշտական վտանգի գոտի, որտեղ առկա է պիրոկլաստիկ և լավային հոսքերի, ինչպես նաև քարաթափման սպառնալիք:

Բացի այդ, ըստ Inquirer-ի տեղեկությունների, Ալբայ նահանգի Կամալիգ համայնքի իշխանությունները երեքշաբթի օրը կարգադրել են տարհանել 118 ընտանիքի՝ հրաբխին վտանգավոր հեռավորության վրա գտնվող գյուղերից: