Դեմ եմ էդ ձևաչափին․ եթե զանգեին էլ, այդ թղթի տակ չէի ստորագրի, հարցերը ժողովում են լուծվում․ Սրբազան

Երեկ Նիկոլ Փաշինյանը հայտարարեց, որ «ՀԱԵ բարենորոգման ճանապարհային քարտեզ» են մշակել 9 եպիսկոպոսների հետ և որ Վեհափառ Հայրապետին հանգստի են կոչելու, որի տակ ինքը ևս ստորագրել էր որպես ՀՀ վարչապետ։

Դեռ ամիսներ առաջ այս նույն 9 եպիսկոպոսների կողմից, որոնք հետագայում ստացան տիրադավ անվանումը, տարածվեց առաջին հայտարարության տեքստը, որի մեջ նշվում էր, թե իբր Ամենայն Հայոց Կաթողիկոս Գարեգին Երկրորդը փորձում է կոծկել և ընթացք չտալ Մայր Աթոռի դիվանապետ Արշակ արքեպիսկոպոս Խաչատրյանի արարքին, որի վերաբերյալ տեսանյութեր էին տարածվել։

Այդ թղթի տակ կար նաև Արթիկի թեմի առաջնորդ, Շիրակի թեմի հոգևոր տեսուչ Գերաշնորհ Տեր Նարեկ եպիսկոպոս Ավագյանի անունը, բայց վերջինս չէր ստորագրել այն։

24News-ն այսօր կապ հաստատեց Նարեկ Սրբազանի հետ, հետաքրքրվեցինք՝ ինչպես էր նախ առաջին անգամ իր անունը հայտնվել, գուցե կուլիսային խոսակցություննե՞ր էին․

«Տեղյակ չեմ, ինձ հետ չեն խոսել, էլի անուններ կային, որ չէին ստորագրել, չեմ կարող բացատրություն տալ»,- ասաց Արթիկի թեմի առաջնորդը։

Մեր այն հարցին, թե հնարավո՞ր է այդ կերպ փորձել էին իրեն հարվածի տակ դնել, ճնշումներ բանեցնել ու ստորագրություն կորզել, Սրբազանը բացառեց․

«Չէ, չեմ կարծում»։

Երեկվա հայտարարության վերաբերյալ ևս հարց հղեցինք Տ․ Նարեկ եպիսկոպոս Ավագյանին, թե արդյոք իր հետ կապվե՞լ են, փորձե՞լ են դիրքորոշումը հասկանալ․

«Ճիշտն ասած՝ նախ չեն փորձել կապվել և հետո երեկվա հայտարարությանն էլ դեռ լիարժեք չեմ տիրապետում՝ ինչ է եղել։

Ենթադրում եմ, որ անունս եղել է նախկինում ու չեմ ստորագրել, իրենք ոնց որ թե հանել են ինձ ցուցակից, դրա համար երեկվա հետ կապված էլ ո՛չ զանգել են, ո՛չ առաջարկել են»,- մեկնաբանեց եպիսկոպոսը

Հարցին, իսկ եթե զանգեի՞ն․

«Բնականաբար, չէի ստորագրի, որովհետև ես էդ ձևաչափին դեմ եմ, եկեղեցու հարցերը պետք է լուծվի Եկեղեցական ժողովներով, սա է իմ մոտեցումը, դրա համար ես շատ ելույթներ չեմ ունենում, որովհետև դրանք մեր ներքին խնդիրներն են, հարցերը պետք է լուծվեն մեր ներքին կանոնական օրենքներով»,- ասաց Նարեկ եպիսկոպոս Ավագյանը։

Մերի Մանուկյան