Ինչ իրավիճակ է Վենեսուելայում
Իրավիճակը ժամերի ու րոպեների հաշվարկով շարունակում է կտրուկ զարգացումներ ունենալ Վենեսուելայում։ Այն բանից հետո, երբ հայտնի դարձավ, որ Միացյալ Նահանգները ավիահարվածներ է հասցրել Լատինա-Ամերիկյան այդ երկրի մի շարք օբյեկտների եւ կարողացել գերեվարել նախագահ Նիկոլաս Մադուրոյին եւ նրա կնոջը, համաշխարհային մամուլի ուշադրությունը կենտրոնացավ այդ երկրում ծավալվող զարգացումների վրա։ Հայտնի է, որ փոխնախագահ Դելսի Ռոդրիգեսը գտնվում է ապահով վիճակում։ ԱՄՆ Պետքարտուղարի տեղակալ Քրիստոֆեր Լանդաուն էլ հայտարարել է, որ Մադուրոն կկանգնի դատարանի առաջ։ Սպասվում է, որ Երեւանի ժամանակով ժամը 20-ին նախագահ Թրամփը կհայտնի իր կեցվածքը տեղի ունեցողի վերաբերյալ։
Ռուսաստանում էլ հայտարարել են, որ Լատինական Ամերիկան պետք է շարունակի լինել խաղաղության գոտի եւ իր համերաշխությունն է հայտնել վենեսուելացի ժողովրդին։ Զուգահեռաբար, կան տեղեկություններ, որ հարվածների հետեւանքով զոհվել են թե պաշտոնյաներ, թե խաղաղ բնակիչներ։ Կարակասի բնակիչները հերթ են կանգնել սուպերմարկետներում եւ դեղատներում՝ ուտելիքի եւ դեղորայքի պաշար հավաքելու համար։ Վենեսուելայի իշխանությունները նախ հայտարարել են, որ Մադուրոյի եւ նրա կնոջ գտնվելու վայրի վերաբերյալ տեղեկացված չեն, եւ ապա նաեւ հայտարարել են, որ կարիք չկա խուճապի մատնվել եւ անարխիա ստեղծել երկրում։ Մայրաքաղաք Կարակասի մոտ գտնվող Լա Վիկտորիա եւ Պուերտո Կաբելյո քաղաքներում իրավիճակը հանդարտ է։ Ամերիկյան դաշնային օրենսդիր մարմնում սկսել են հնչել քննադատություններ Թրամփի՝ Վենեսուելայում իրականացվող ռազմական գործողության վերաբերյալ։
Հետևեք մեզ Viber-ում
