Շիրակի թեմի հոգևոր տեսուչ Գերաշնորհ Տեր Նարեկ եպիսկոպոս Ավագյանի ձեռամբ կատարվել է դպրական տվչություն
Սուրբ Աստվածածին Մայր եկեղեցում (Յոթ Վերք) կատարվել է դպրական տվչություն, հայտնում են Հայ Առաքելական Եկեղեցու Շիրակի թեմից։
Նշվում է, որ Արթիկի թեմի առաջնորդ, Շիրակի թեմի հոգևոր տեսուչ Գերաշնորհ Տեր Նարեկ եպիսկոպոս Ավագյանի ձեռամբ է կատարվել դպրական տվչությունը։
Դպրական աստիճան են ստացել Շիրակի թեմի եկեղեցիներում սպասավորող 13 եկեղեցասեր հայորդիներ՝ Հովսեփ Գևորգյանը, Ռուբեն Ադամյանը, Նարեկ Մինասյանը, Կորյուն Թադևոսյանը, Վաղարշակ Սարգսյանը, Սանասար Իսկանդարյանը, Օնիկ Վարդանյանը, Արա Մարտիրոսյանը, Մհեր Առաքելյանը, Արթուր Կոստանյանը, Հակոբ Բերնեցյանը, Դավիթ Դավթյանը և Ռոբերտ Վարժապետյանը: Շիրակի թեմի եկեղեցիներում սպասավորող ևս 4 հայորդիներ՝ Մանուկ Հովհաննիսյանը, Իշխան Բարոյանը, Կարեն Խաչատրյանը և Վաղարշակ Սարգսյանը ստացել են նաև ուրար կրելու իրավունք:
Հավարտ արարողության՝ դպիրներին իր հայրական օրհնությունն է շնորհել Նարեկ Սրբազանը:
«Հոգևոր մխիթարությամբ և խառը զգացմունքներով ենք համակված այսօր այստեղ, որովհետև կատարեցինք դպրական ձեռնադրություն, բայց ինչպես ասացի՝ խառը զգացողությամբ, որովհետև այսօր մեր սիրելի Սրբազանի տարեդարձն է, բայց բոլորդ էլ լավ գիտեք, թե ինչ վիճակում է այսօր Սրբազանը: Ուրեմն, մենք մասնավորաբար այս ձեռնադրությունը ամսի 24-ի փոխարեն կատարեցինք այսօր, որ մեծագույն նվեր լինի մեր սիրելի Սրբազանին, և ինչպես մեզ համար, այնպես նաև իր համար լինի հոգևոր մխիթարություն: Այս ձեռնադրությունը, ձեր ներկայությունը, բայց նաև ու մանավանդ ձեր նախանձախնդիր ծառայությունը խոսում է այն բանի մասին, որ այս թեմը շարունակում է իր առաքելությունը: Հետևաբար, հասկանում ենք ամենքս, որ որքան մեծ պատասխանատվություն ունենք այս պահին, երբ մեր Սրբազանը բանտարկելության մեջ է, որ մենք պետք է կարողանանք իր նպատակները, իր ծրագրերը, ի վերջո՝ իր տարիների ծառայությունն ու աշխատանքը շարունակել, որպեսզի իր համար լինի մխիթարություն, իսկ մեզ համար լինի այն ներքին զսպանակող ուժը, որով պիտի կարողանանք Սրբազանին փոխանցել մեր զգացմունքները, մեր սերը», - իր խոսքում նշել է Նարեկ Սրբազանը:
Արարողությանը ներկա էին թեմի արժանապատիվ Տեր Հայրերը, ծնողներ, հավատացյալներ:
Հետևեք մեզ Viber-ում
