«Եթե Գալուստ Սահակյանը «Մերսեդես» էլ քարոզի, «Մերսեդեսի» վաճառքը կարող է նվազել»․Վիգեն Հակոբյան
Քաղտեխնոլոգ Վիգեն Հակոբյանը լրագրողների հետ հանդիպմանը ամփոփեց տարին և սկսեց ընտրություններին և դրանց հաջորդած շրջանում զարգացումներին. «Առաջին անգամ վերջին տարիների ընթացքում չեղան հետընտրական զարգացումներ, և տասնամյակներից հետո առաջին անգամ ընդդիմությունը չխոստացավ թեժ աշուն»: «Հանրությանը կարելի է մեղադրել, քանի որ փաստն այն է, որ ընտրական միջոցառումների ձայների վաճառքի, վարչական ռեսուրսի ազդեցության տակ գործողությունների մեխանիզմների մեջ ավելի շատ զանգվածներ են սկսում ներքաշվե: Բավականին շատ դեպքեր են եղել, որ նույն նախագահական ընտրություններից հետո այդ այլընտրանք կոչեցյալն ինքն էր գործարքի մեջ մտնում իշխանության հետ։ Եվ կարծես թե հասարակության ստվար զանգվածի մոտ արմատավորվել է այն կարծիքը, որ մեզ միջնորդներ պետք չեն իշխանության հետ փողային հարաբերությունների մեջ մտնելու համար։Պետք է մեղադրվեր հասարակությունը, որովհետև ընդդիմություն կոչվածը կամ այն ուժերը, որոնք դիրքավորվում են այդ դաշտում, պետք է բացատրեն իրենց պարտությունը՝ ինչ-ինչ պատճառաբանություններով»,-ասաց նա: « Իշխանությանը կարելի է և՛ մեղադրել, և՛ չմեղադրել, որովհետև նա մտնում է քաղաքական պրոցեսի մեջ և փորձում իր համար հնարավորինս կոմֆորտային ընդդիմություն ձևավորել:Իշխանությունը մտածելով իր մասին, մտածում է նաև ընդդիմության փոխարեն, թե ով պետք է ներկայացված լինի, և ինչ քվոտայով աշխարհաքաղաքական մասնակցություն ապահովել, որովհետև միայն պրոռուսական ընդդիմությունն էլ նորմալ չի համարվում, պետք է ապահովել արևմտամետ իմիջով ընդդիմություն։ Ժամանակին դա «Ժառանգությունն» էր, հիմա «Ելքն» է այդ սեգմենտը»,ասաց նա: Ստեղծվում է մի իրավիճակ, երբ ընդդիմությունը մեղադրում է հասարակությանը, իսկ հասարակությունը՝ ընդդիմությանը,ասաց նա: «2018թ. ապրիլին սպասվող փոփոխություննները և հանրապետականների անորոշությունը պայմանավորված է նրանով, որ երկար տարիներ իրենց մոտ ամեն ինչ հրահանգներով է եղել:Հիմա իրենց մոտ խառնաշփոթ է։ Մի կողմից՝ Կարեն Կարապետյանը հայտարարում է, որ ուզում է լինել վարչապետ, և հանրապետականների ուղեղներում միանգամից կասկած է առաջանում, որ առանց շեֆի հետ համաձայնեցնելու՝ նման բան դժվար թե ասեր։ Հետո Գալուստ Սահակյանն է հայտարարություն անում, ու լրիվ այլ պատկեր է առաջանում, որ՝ առանց շեֆի ասելու՝ նա նման բան չէր կարող ասել։ Գալուստ Սահակյանի ասածը արջի ծառայություն էր, քանի որ նրա ասածը սև PR է։ Եթե Գալուստ Սահակյանը «Մերսեդես» էլ քարոզի, «Մերսեդեսի» վաճառքը կարող է նվազել։ Ես կարծում եմ՝ խառնաշփոթը հենց դրանում է, որ բոլոր քաղաքական գործիչների ասածներն իրենք որպես ակնարկ են ընկալում։ Հիմա բոլորը փորձում են հասկանալ, թե իրենց միակ առաջնորդն ում է ինչ ասել»,ասաց քաղտեխնոլոգը:
Հետևեք մեզ Viber-ում
