Ֆորմուլան պետք է գործի՝ ազնվություն գումարած պրոֆեսիոնալիզմ հանած կոռուպցիա.Շարմազանով
«ԵԱՏՄ-ն Հայաստանին տվեց զարգանալու հնարավորություն: Մենք տարածաշրջանում լավագույն երկիրն ենք տնտեսական ակտիվության առումով, Հայաստանն առաջ է թե Թուրքիայից, թե Ադրբեջանից, թե Վրաստանից, թե ԱՊՀ բոլոր երկրներից: 2017թ.-ը բավականին հագեցած եւ դրական տարի էր» ,-ամփոփելով անցնող տարին այսպես բնորոշեց Ազգային ժողովի փոխնախագահ, ՀՀԿ մամուլի խոսնակ Էդուարդ Շարմազանովը լրագրողների հետ հանդիպմանը:
«Այս տարի անվտանգության, ներքին եւ արտաքին քաղաքականության զարգացման առումով ավելի շատ դրական իրավիճակներ կային, քան բացասական: Ապրիլի 2-ին կայացած խորհրդարանական ընտրությունները հաջողված էին:Այս ընտրությունները հաջողված էին, իրենց թերություններով հանդերձ՝ սրանք լավագույնն էին անկախ Հայաստանի խորհրդարանական ընտրությունների պատմության մեջ: Միջազգային դիտորդների կողմից որեւէ կասկած քաղաքացիների քվեարկության գաղտնիությունն ապահովելու առումով չի եղել: Այս ընտրությունները շատ կարեւոր քայլ էին ժողովրդավարացման զարգացման առումով»,- ասաց Էդուարդ Շարմազանովը:
Հաջորդ կարեւոր իրադարձությունը, ըստ ՀՀԿ մամուլի խոսնակի, մայիսի 18-ին Սերժ Սարգսյանի ծրագրային ելույթն էր. «Անկախ նրանից՝ ով է լինելու վաղը կամ մյուս օրը երկրի ղեկավարը, չի կարող անտեսել այդ մարտահրավերները: Առաջինը, կոռուպցիայի դեմ պայքարն է, որի դեպքում հետեւյալ ֆորմուլան պետք է գործի՝ ազնվություն գումարած պրոֆեսիոնալիզմ հանած կոռուպցիա, եթե չգնանք այս ճանապարհով, արդյունավետ կառավարում չենք ունենալու: Երկրորդը, ժողովրդագրական խնդիրներն են. մենք դրեցինք հստակ չափանիշ, թե ինչքան բնակչություն ենք ունենալու 2040թ.-ին»: «Այս տարին հոբելյանական էր Ռուսաստանի հետ դիվանագիտական հարաբերությունների առումով:Իրական դաշնակցային հարաբերություններ ունենք Ռուսաստանի հետ: Մեր խորին համոզմամբ, այդ դաշնակցային հարաբերությունները պետք է խորացնել եւ զարգացնել: Ինչ վերաբերվում է ԵՏՄ-ին, ապա այն մեզ շատ լավ հնարավորություններ է տվել զարգանալու: Թվեր չեմ ներկայացնի, բայց տարին բավականին հուսադրող է, մենք լավագույնն ենք տնտեսական ցուցանիշներով, Հայաստանը տնտեսական ցուցանիշներով առաջ է ԱՊՀ երկրների շարքում: ԵՄ-ի հետ համաձայնագիրն էլ մեզ համար կարեւոր նշանակություն ունի»,- նշեց Շարմազանովը:
Հետևեք մեզ Viber-ում
