Ադրբեջանական բենզինի հակառակ կողմը

Նիկոլ Փաշինյանը շարունակում է «խաղաղություն» կոչված իմիտացիաներով զբաղվել, որպեսզի կարողանա 2026–ի խորհրդարանական ընտրություններին ընդառաջ խաբել փոքրաթիվ միամիտ զանգվածներին։

Փորձելու է նաև իրեն չհավատացողներին վախեցնել, թե բա՝ եթե ես չմնամ իշխանության, ապա պատերազմ կլինի։

Նիկոլն իմիտացիաների հարցում ապավինում է Էրդողանին ու Ալիևին։ Էրդողանը խոստացել է 2026–ին ընդառաջ խորհրդանշական քայլեր անել Հայաստանի ուղղությամբ։ Ալիևն էլ «ցորեն և բենզին» ծրագրի շրջանակներում է օգնում Նիկոլին, որպեսզի իմիտացիան ճշմարտանման թվա։

Էրդողանն ու Ալիևը հասկանում են, որ Նիկոլի նման նվեր իրենք երբեք չեն ստանալու, դրա համար էլ դողում են նրա աթոռի համար։

Նիկոլն աջակցություն է խնդրում Թուրքիայից ու Ադրբեջանից՝ դիմացը խոստանալով բավարարել նրանց բոլոր նախապայմանները՝ սկսած Սահմանադրության փոփոխությունից մինչև ադրբեջանցիներին Հայաստանում բնակեցնելը։ Էրդողանի, Ալիևի, Փաշինյանի միջև տեղի է ունեցել փոխշահավետ գործարք՝ Հայաստանի հաշվին։

Այս ամենի արանքում ԱԺ պատգամավոր Խաչատուր Սուքիասյանը, օգտվելով առիթից, փող է աշխատում։ Ադրբեջանական բենզինը նրա հետ փոխկապակցված կազմակերպությունն է բերում։

Սուքիասյանն էլ, Փաշինյանն էլ գիտեն, որ սա ոչ թե խաղաղության շրջանակներում է, ոչ թե բիզնես է, այլ մեկանգամյա քարոզչական ակցիա՝ թոզփչոցի։ Գիտեն, բայց ամեն մեկն իր շահն ունի, փողն էլ, ի տարբերություն բենզինի, հոտ չունի։ 600 տոննա բենզինինն՝ առավելևս։

Այնպես որ Արցախի, Հայաստանի, ՀՀ քաղաքացիների հաշվին աթոռ են պահում ու փող աշխատում։

Հայկ Ուսունց

7or.am