Ծնողներին նախ փորձել էր հրկիզել, չէր կարողացել, իսկ տարիներ անց հաջողվեց նրանց զրկել կյանքից՝ դանակահարելով. 37-ամյա գյումրեցին կալանավորվել է

Գյումրիում ծնողներին կյանքից զրկած 37-ամյա տղամարդը կալանավորվել է։ Այս մասին «Փաստինֆո»-ն տեղեկանում է ՔԿ-ից։

Դեպքը, հիշեցնենք, տեղի է ունեցել դեկտեմբերի 16-ին։ 37-ամյա տղամարդը դանակահարել է 64-ամյա հորը և 63-ամյա մորը, ինչի հետևանքով նրանք մահացել են։ Դեպքի առթիվ նախաձեռնվել է քրեական վարույթ՝ Քրեական օրենսգրքի 155-րդ հոդվածի 2-րդ մասի 9-րդ կետի (սպանությունը) (2 դրվագ) և 334-րդ հոդվածի 1-ին մասի (ապօրինի կերպով քաղաքացիական ողորկափող հրազեն, գազային, օդաճնշիչ, սառը կամ նետողական զենք կրելը) հատկանիշներով: 37-ամյա տղամարդը ձերբակալվել էր։ Հետագայում, սակայն, ինչպես պարզվել է՝ տղամարդը տարիներ առաջ արդեն փորձել էր սպանել ծնողներին՝ նրանց վրա դյուրավառ հեղուկ լցնելով և դանակի հարվածներ հասցնելով: Հանցագործությունն ավարտին հասցնել չէր հաջողվել, քանի որ ընտանիքի անդամները միջամտել էին։ Քրեական գործով տղամարդը կալանավորվել էր, սակայն հետագայում անմեղսունակ ճանաչվել և տեղափոխվել ՀՀ առողջապահության նախարարության «Նուբարաշեն հոգեբուժական կլինիկա» ՓԲԸ՝ հարկադիր բուժման: Հոգեբուժական կենտրոնից տղամարդը դուրս էր գրվել վերջերս և կարճ ժամանակ ազատության մեջ մնալուց հետո սպանել ծնողներին։ Այժմ տղամարդը հոգեբուժական կենտրոնում չէ։

Քննչական կոմիտեից «Փաստինֆո»-ի հետ զրույցում նշեցին, որ քրեական վարույթի նախաքննության ընթացքում անձի նկատմամբ հարուցվել է հանրային քրեական հետապնդում՝ Քրեական օրենսգրքի 155-րդ հադվածի 2-րդ մասի 9-րդ կետով (մերձավոր ազգականի, զուգընկերոջ կամ նախկին զուգընկերոջ կողմից սպանությունը) (2 դրվագ) և 334-րդ հոդվածի 1-ին մասով (ապօրինի կերպով քաղաքացիական ողորկափող հրազեն, գազային, օդաճնշիչ, սառը կամ նետողական զենք կրելը): Վերջինս կալանավորվել է:

Հեղինակ՝ Իզաբել Սահակյան