3 հոգի էին ագրեսիվ` Սափեյանը, Դուրգարյանը և Կարեն Պետրոսյանը. «Հրապարակ»
«Հրապարակ». Տեր Վրթանես քահանա Բաղալյանի սրտի վրա եւս 3 ստենտ են տեղադրել։
«Ինձ լավ եմ զգում, շատ շնորհակալ եմ մեր բանիմաց ու շատ հոգատար բժիշկներին ու բժշկական անձնակազմին, շուտով հնարավորություն կունենամ վերադառնալ իմ հոգեւոր ծառայությանը»,- ասաց Տեր Վրթանեսը:
Անդրադառնալով Օպերայի փոխտնօրեն Վրեժ Դուրգարյանի հետ կապված դրվագին՝ նա ասաց, որ վերջինս կանգնել էր կաթողիկոս Ալեքսանդր Ջուղայեցու տապանաքարի վրա եւ կոչ էր անում՝ տաճարի դուռը հարվածելով բացել ու ներս մտնել: «Երեւի տասնյակ անգամներ իրեն հորդորեցի իջնել, կանգնել էր տապանաքարի վրա ու կոչ էր անում՝ հարվածելով կոտրել, բացել դուռը, որը Մայր Թերեզա Թաիրյանն էր նվիրել Խրիմյան Հայրիկին, եւ որը բացառիկ արժեք է ներկայացնում իրենից: Տասնյակ անգամներ խնդրեցի, հորդորեցի՝ իջնել, սակայն նա այն վիճակում էր, որ ունակ չէր խոսք հասկանալ, ստիպված՝ բարձրացա սյան վրա ու իր ուսից քաշելով՝ իջեցրի: Անհնար էր նայել, թե ոնց է կանգնել կաթողիկոսի գերեզմանաքարի վրա ու անընդհատ գոռում, տաճարի դուռը կոտրելու կոչեր անում: Այդ ընթացքում կրծքավանդակումս սուր ծակոցներ զգացի»,- պատմեց Տեր Վրթանեսը: Այդ պահին էլ երեւի հենց ինֆարկտ է տարել, սակայն դիրքերը չի զիջել: «Մայր տաճարը պաշտպանողներին ոստիկանության մի հատվածը հրելով այն կողմ տարավ, ու եկեղեցու վրա գրոհողներն առաջ եկան, սակայն ի սկզբանե Մայր Աթոռ եկած ոստիկանների խումբն էր ինձ պաշտպանում, իրենց շնորհիվ իմ վրա չհարձակվեցին: Այդ մարդիկ սթափ չէին, նրանք ինչ-որ բանի ազդեցության տակ էին՝ ոմանց վրայից ալկոհոլի հոտ էր գալիս: Իսկ քաղաքացիական համազգեստով ուժայինները շատ ագրեսիվ հարվածներ էին հասցնում լրագրողներին, որոնց հիմնական մասն աղջիկներ ու կանայք էին, ու պարեկներին: Չեք պատկերացնի, թե ինչպես էին հարվածում պարեկներին, որոնք փորձում էին հոգեւորականներին պաշտպանել»,- պատմեց նա:
Ինչ վերաբերում է եկեղեցին ասպատակողներին, ըստ Տեր Վրթանեսի` երբ տաճարի դուռը բացվել է, ու այնտեղից սկսել են մարդիկ դուրս գալ, վերջիններս նահանջել են. «Երբ տեսան մայր տաճարից դուրս եկող տղամարդկանց, միանգամից զսպվեցին»:
Շեշտում է, որ ամենից ագրեսիվ վարքով աչքի են ընկել Թալինի քաղաքապետ Տավրոս Սափեյանը, օպերային թատրոնի փոխտնօրեն՝ Կարեն Դուրգարյանի եղբայր Վրեժ Դուրգարյանը եւ Կարեն Պետրոսյանը՝ «Նոր Հայաստան՝ նոր հայրապետ» տխրահռչակ շարժման ղեկավարներից մեկը` ԵՊՀ Շիրակի մասնաճյուղի ռեկտորը:
Հետևեք մեզ Viber-ում
