«Իրոք, Սևակի արձանի մազերը շատ են, էլի աշխատելու տեղեր կան, վաղը կգնամ, կբերեմ Երևան»․ Թոքմաջյան
Դեռ չեմ կարողացել գնալ և Զանգակատուն գյուղի դպրոցի բակից բերել Պարույր Սևակի արձանը։ Այս մասին 24News-ին հայտնեց քանդակագործ Լևոն Թոքմաջյանը։
«Վաղվա համար ենք պայմանավորվել, դե մի քիչ խնդիրներ կան, «կռան» պետք է լինի։ Ըստ մոտավոր պայմանավորվածության՝ վաղն առավոտյան գալու է մեր հետևից կռանը, որ գնանք, բարձենք ու բերենք։ Այսքանից հետո, որ ես մի քիչ նայեցի, իրոք, որտեղ, որ ես աշխատում էի, շատ բան չէր երևում, գետնին էր դրված, հիմա, որ բարձրացրել ենք, գուցե մազերը մի քիչ շատ են, այսինքն՝ աշխատանք ունեմ անելու, կբերեմ, վրան կաշխատեմ»,-ասաց նա։
Նրա խոսքով, «քանդակը տարբեր լուսավորության տակ տարբեր ձև է երևում»։ «Դպրոցում քանդակն անընդհատ ստվերի մեջ է», – նշում է քանդակագործը՝ անդրադառնալով լայն զանգվածների քննարկման առարկա դարձած արձանին։
«Որովհետև շենքը մի քիչ բարձր է, արևը շենքի հետևով է գալիս, իսկ քարը ստվերի մեջ չի երևում։ Առաջին մինուսն է, որ ինձ խանգարեց։ Եթե ես նույնիսկ ինչ-որ շտկումներ անեմ, հլը պիտի մտածեմ՝ հե՞տ տանեմ, թե՝ չէ։ Եթե տանեմ, էլի նորից նույն պատմությունն է լինելու։ Օրինակ՝ այնտեղ, որ ձախ ձեռքը դրված է գրքերի վրա, ստվերի մեջ այդ թղթերը չեն երևում, թվում է՝ դա իր փորն է։ Այդպիսի խնդիրներ կան, էլի, այնպես որ, վաղը ես կբերեմ»,-ասաց նա։
Հետևեք մեզ Viber-ում
