Նույնիսկ րոպեները կարող էին որոշիչ լինել, բայց այս պահին Տեր Վրթանեսի կյանքին վտանգ չի սպառնում. Բժիշկը մանրամասներ է պատմում
Երեկ երեկոյան Մայր Աթոռ Սուրբ Էջմիածնից Տեր Վրթանեսը «Մաստերմեդ» բժշկական կենտրոն էր տեղափոխվել «սրտամկանի սուր ինֆարկտ կարդիոգեն շոկ» ախտորոշմամբ։
«Կատարվել են կորոնարոգրաֆիա, ինտենսիվ թերապիայի միջոցառումներ, որից հետո Տեր Հոր սիրտը ստենտավորվել է»,- Aysor.am-ի հետ զրույցում ասաց «Մաստերմեդ» ԲԿ տնօրեն Վիկտորյա Պողոսյանը։
Այս պահին Տեր Վրթանեսը գտնվում է ինտենսիվ թերապիայի բաժանմունքում, վիճակը գնահատվում է կայուն բավարար։
«Հուսով ենք, որ առաջիկայում Տեր Վրթանեսին կտեղափոխեն հիվանդասենյակ»,-ասաց ԲԿ տնօրենը։
Նա նշեց, որ այս պահին սուր վիճակ չկա, բայց ապաքինման շրջանի անհրաժեշտություն կա։
Տեր Հորը ԲԿ են տեղափոխել շտապօգնության մեքենայով, վիճակը եղել է ծայրահեղ ծանր։
«Նման դեպքերում նույնիսկ րոպեները կարող են որոշիչ լինել։ Ի ուրախություն բոլորի, մեր բժշկական թիմի շնորհիվ մեզ մոտ կատարվել են համապատասխան բոլոր ցուցված միջոցառումները, ինչի արդյունքում հնարավոր է եղել փրկել հիվանդի կյանքը»,-ասաց Վիկտորյա Պողոսյանը։
Հետևեք մեզ Viber-ում
