Դպրոցի աշխատակիցներին պարտադրում են մասնակցել Եկեղեցու դեմ հավաքին, իսկ ԿԳՄՍ-ն՝ «դիտորդի» դերում է

Հանրության լայն շերտերի կողմից «տիրադավ» անունը ստացած 10 եպիսկոպոսների կողմից այսօր Մայր Աթոռ Սուրբ Էջմիածնում հայտարարված «հոգևոր» հավաքից առաջ իշխանության ներկայացուցիչները լծվել են ակտիվ գործողությունների՝ Էջմիածնում հնարավորինս մեծ ներկայություն ապահովելու նպատակով։

Euromedia24-ի տեղեկություններով՝ Վեհափառ Հայրապետի դեմ կազմակերպվող հավաքին մասնակցություն ապահովելու համար մարզպետարանները գործի են դրել իրենց ողջ վարչական լծակները։ Մասնավորապես՝ դպրոցների և մանկապարտեզների ուսուցիչներին զանգերի և ուղիղ հրահանգների միջոցով պարտադրվել է մասնակցել Մայր Աթոռում նախատեսված հավաքին, ինչպես նաև հանձնարարել են իրենց հետ բերել առնվազն հինգ հոգի՝ հավաքի թվաքանակն ապահովելու համար։

Euromedia24-ը կապ է հաստատել Կրթության, գիտության, մշակույթի և սպորտի նախարարության հետ։ Մեր հարցմանը ի պատասխան նախարարությունում նշել են, որ նման իրավիճակ «չի կարող լինել»։ Սակայն այն պնդմանը, որ ստանում ենք բազմաթիվ ահազանգեր տվյալ փաստի վերաբերյալ, նախարարությունից առաջարկել են առցանց նամակ ուղարկել՝ գրավոր պատասխան ստանալու նպատակով։ Փաստացի՝ մի իրավիճակում, երբ խոսքը վերաբերում է կրթական համակարգի աշխատակիցների վրա հնարավոր ճնշումներին և վարչական ռեսուրսի կիրառմանը, նախարարությունը կրավորական կեցվածք է որդեգրում․ նման հրատապ իրավիճակում արագ արձագանքելու փոխարեն պահանջվում է գրավոր հարցում։