Նոր վարկային բեռ

Հայաստանը նոր վարկային պարտավորության առաջ է կանգնում։ Այս անգամ՝ 100 միլիոն եվրոյի չափով։ Վարկատուն Համաշխարհային բանկն է, ոլորտը՝ զբոսաշրջությունը։ Հայաստանի կառավարությունը ներդնում է ևս 20 միլիոն, և ընդհանուր 120 մլն եվրոն առաջիկա հինգ տարիների ընթացքում կօգտագործվի յոթ զբոսաշրջային կլաստերների համար։ «Փաստինֆո»-ի հետ զրույցում «Տուրիզմի հայկական ֆեդերացիայի» նախագահ Մեխակ Ապրեսյանը նշեց՝ եթե գումարը ճիշտ օգտագործվի, չփոշիացվի, այլ ծառայի իր նպատակին, ապա իսկապես կունենանք ենթակառուցվածքներ, որոնք կզարգացնեն զբոսաշրջությունը։

«Մենք շատ ռեսուրսներ ունենք՝ պատմամշակութային կենտրոններ, ազգային խոհանոց, չքնաղ բնություն, զգալի հնարավորություններ, բայց դրանք ամբողջությամբ չենք օգտագործում։ Հայկական զբոսաշրջության դիվերսիֆիկացումը, մեկ-երկու շուկաներից կախվածության նվազեցումը, աշխարհին ճիշտ ներկայանալը զբոսաշրջության քաղաքականության կարևոր խնդիրներից են։ Լուծելով դրանք՝ մենք ավելի մրցունակ կլինենք։ Եթե կառավարությունը կարողանա ծրագիրն արդյունավետ իրականացնել, համագործակցել մասնավոր սեկտորի, ինստիտուցիոնալ կառույցների հետ, թեկուզ՝ խորհրդակցական կարգով, այդ դեպքում, կարծում եմ, կարող է և արդարացվել»,– նշում է Մեխակ Ապրեսյանը։

Ըստ Զբոսաշրջության կոմիտեի տվյալների՝ այս տարվա յոթ ամիսները (մայիս–նոյեմբեր) աննախադեպ են եղել․ գրանցվել է զբոսաշրջիկների թվի պատմական ռեկորդ։ Եթե նախորդ տարի ունեցել ենք 2,2 միլիոն զբոսաշրջիկ, ապա ընթացիկ տարվա նոյեմբերի վերջի դրությամբ՝ 2 միլիոն 100 հազար զբոսաշրջիկ։ Պաշտոնական տվյալներով՝ զբոսաշրջիկ են համարվում նրանք, ովքեր առնվազն մեկ գիշերակաց են ապահովում մեր երկրում։ Մեխակ Ապրեսյանը նկատում է՝ յուրաքանչյուր ոլորտի զարգացման համար անհրաժեշտ է մասնագիտական լուրջ վերլուծություն և կարծիք։ Յուրաքանչյուր մանրուք կարող է բացասաբար ազդել ոլորտի վրա, անգամ՝ օդի աղտոտվածությունը։

«Եթե գեթ մեկ զբոսաշրջիկ դժգոհի Երևանի օդի աղտոտվածությունից, փոշուց և կեղտից, ապա զբոսաշրջիկների դժգոհությունները ձնագնդի էֆեկտով կարող են բացասաբար ազդել երկրի իմիջի վրա։ Դրա համար անհրաժեշտ է փորձագետների լուրջ մասնագիտական վերլուծությունն ու կարծիքը։ Մենք զբոսաշրջիկների նկատմամբ պետք է շատ զգույշ և պատասխանատու լինենք»,– նկատում է «Տուրիզմի հայկական ֆեդերացիայի» նախագահ Մեխակ Ապրեսյանը։