Էս ինչ անհարմար բան ստացվեց
Ինչպես հայտնի է, ՀՀԿ-ի օդիոզ հատվածը՝ Գալուստ Սահակյանի գլխավորությամբ, գտնում է, որ 2018-ի ապրիլից Սերժ Սարգսյանը պետք է շարունակի ղեկավարել Հայաստանը՝ վարչապետի կարգավիճակով,քանի որ ըստ նրանց՝ ՀՀԿ ղեկավարն անփոխարինելի է, ամենափորձառուն է, ամենա-ամենան է: Բանը հասել է նրան, որ Սերժ Սարգսյանին դիֆերամբներ ձոնելու թրենդ է տարածվել ու թրենդից հետ չեն մնում անգամ անկուսակցական, բայց իշխանական պատգամավորները: Եւ նույնիսկ քաղաքական սցենարներից իրեն դուրս դրած նախկին դատախազ Գեւորգ Կոստանյանը, ով նախկինում իսպառ հրաժարվում էր քաղաքական հարցերի մասին խոսել, արդեն երկրորդում է մաեստրոյին ու Սերժ Սարգսյանին ձոն հյուսում: Խոսելով տեսակետների մասին, որ վարչապետի հավանական թեկնածուն Սերժ Սարգսյանն է,Կոստանյանը ակնածանքով է հիշել Սերժ Սարգսյանի անցած ճանապարհը՝ Հայաստանի անկախության պահից սկսած և մինչև անկախությունը, անձնական, բարոյական, կառավարչական հմտությունները, ապա եզրակացրել.«Եթե Սերժ Սարգսյանը չդառնա վարչապետ, ապա Հայաստանը շատ բան կկորցնի»: Ամեն դեպքում վերջին մի քանի ամիսներին ՀՀԿ-ականները նախանձելի վիճակում չեն, մինչեւ Սերժ Սարգսյանը նրանց կհայտնի, թե ով է լինելու ապրիլին վարչապետը, նրանց այլ բան չի մնում, քան կատարել սուրբ պարտականությունը, քծնել իրենց ղեկավարին, երբեմն արհամարհել նրա կամքը, ասելով, եթե չուզի էլ, ապա պետք է խնդրենք, որ դառնա վարչապետ,քանի որ ինքն է այն մինուճարը, ով կարող Հայաստանը առաջ տանել, անվտանգ պահել: Եւ այս անորոշ մրցավազքի մեջ ոմանք խճճվել են, մի օր մի բան են ասում, հաջորդ օրը մեկ ուրիշը: Երկու օր առաջ էլ Վահրամ Բաղդասարյանն էր ասում, թե Սերժ Սարգսյանը չի հավակնում դառնալ վարչապետ, նա հորդորում էր համբերատար սպասել՝ ակնարկելով անակնկալի մասին: Մի կողմից խմբակցության ղեկավարը պնդում էր նախագահի հավակնությունների բացակայության մասին, մյուս կողմից՝ վստահեցնում, թե քննարկումներ չեն եղել: Բաղդասարյանը կասկածի տեղ էր բացել, միգուցե Սերժ Սարգսյանը նրան անձամբ է հայտնել, որ չի ուզում վարչապետ դառնալ, շատերը չհասցրեցին ուրախանալ, երբ մեկ օր հետո՝ երեկ Գալուստ Սահակյանը բոլորի փոխարեն ավետեց.<< Հանրապետականն այսօր արդեն քննարկել է և ասում է, որ պետք է լինի նախագահ Սերժ Սարգսյանը»,-ասել է Գրիգորիչը ու հստակեցրել, որ ոչ թե ՀՀԿ-ն ժողով է գումարել, քննարկել, որ վերջնական ՀՀ վարչապետ պետք է լինի Սերժ Սարգսյանը, այլ իր՝ Գալուստ Սահակյանի հայտարարությունից հետո գնում են այդ ճանապարհով: Այս դժվարին ճանապարհում չմոռանանք նաեւ Էդուարդ Շարմազանովի կարեւոր դերակատարումը, ով իր վրա է վերցրել հող նախապատրաստել Սերժ Սարգսյանի նախկին խոստումները դրժելու համար: Անդրադառնալով սահմանադրական հանրաքվեից առաջ հնչեցրած Սերժ Սարգսյանի պաշտոնական խոստմանը, որ եթե անցում կատարվի խորհրդարանական կառավարման համակարգին, ապա ինքը չի հավակնի վարչապետի պաշտոնին՝ Շարմազանովն իր հարցազրույցում նշել է հետևյալը. «Ինչ վերաբերում է նրան, որ իր խոսքից հետ է կանգնում, հետ չի կանգնում, գիտեք ինչ կա, սա քաղաքականություն է։ Սա, կներեք, փողոցի կռիվ չի կամ հարաբերություններ պարզել, որ էս թվին սենց ես ասել, ուրեմն սենց պիտի լինի։ Քաղաքականության մեջ կարող են համակարգեր փոխվել, կարող է իրավիճակ փոխվի»: Շարմազանովն ուզում է ասել, որ հիմա իրավիճակ է փոխվել և Սերժ Սարգսյանի նախկինում արված հայտարարությունն այլևս ուժը կորցրած պետք է համարել: Բայց ինչ անհարմար բան ստացվեց: Ինչքան հետ է մեր ազգը , աշխարհիս բանից անտեղյակ մենք էլ խելոք-խելոք լսում ենք այս իշխանություններին ու հույս տածում, որ իրենց խոսքի տերը կլինեն: Ամոթ, մեզ, որ կյանքից հետ ենք ընկել ու չենք հասկանում, որ սա քաղաքականություն է, որտեղ կարելի է ստել, հետ կանգնել սեփական խոսքերից, որտեղ անգամ երկրի ղեկավարը հաշիվ չի տալիս իր խոսքերին: Արդար չի, ժողովուրդ ինչպես հակառակը կհամոզեին մեզ լոտոյի գովազդներում, այնպես որ պատրաստ եղեք, որ մի օր էլ Շարմազնովը նման առիթներով հայտնի ֆիլմի ինժիներ բալայի ոճով մեր հետաքրքրասիրություններին ու հիշեցումներին կպատասխանի.<<Կներեք, բայց ձեր ինչ գործն է…. թե մենք ինչ ենք ասել ու ինչ են անելու>>: Անի Սահակյան
Հետևեք մեզ Viber-ում
