Ավտոմեքենայի և գնացքի բախում՝ Գեղարքունիքում

Երեկ՝ դեկտեմբերի 15-ին, ավտոմեքենայի և գնացքի բախման հերթական դեպքն է տեղի ունեցել Գեղարքունիքի մարզում։ Ժամը 20։20-ի սահմաններում Վարդենիս-Շորժա-Ծովագյուղ ավտոճանապարհի 1-ին կմ հատվածում՝ Մեծ Մասրիկ գյուղի մոտ, «Mercedes» մակնիշի ավտոմեքենան բախվել է բեռնատար գնացքի վագոնին և հեռացել դեպքի վայրից։

Ինչպես հայտնում է ֆոտոլրագրող Գագիկ Շամշյանը, բախման հետևանքով, ըստ նախնական տեղեկությունների տուժածներ չկան։

Դեպքի վայր են ժամանել ՀՀ ներքին գործերի նախարարության ոստիկանության Պարեկային ծառայության Գեղարքունիքի մարզի գումարտակի 2-րդ վաշտի 3-րդ դասակի պարեկները՝ գումարտակի հրամանատար Աղասի Խաչատրյանի, գումարտակի հրամանատարի տեղակալ Իգոր Ղազարյանի, գումարտակի ծառայության ավագ տեսուչ Ներսիկ Գրիգորյանի, վաշտի հրամանատար Արթուր Եղիազարյանի և դասակի հրամանատար Նավասարդ Արարատյանի գլխավորությամբ։

Տարածքը սահմանազատել են նույն վաշտի պարեկներ Կարեն Հովհաննիսյանը և Աշոտ Գևորգյանը։

Պարեկները ստացված օպերատիվ տեղեկությունները իրացնելով պարզել են ավտոմեքենայի մակնիշը և գտնվելու վայրը այնուհետև հայտնաբերել այն։

Դեպքի փաստով ՊԾ Գեղարքունիքի մարզի գումարտակում փաստաթղթեր են ձևակերպվել, որտեղ էլ պարզվում է վարորդի ինքնությունը։