«Հերիք է էդքան իջնեք». Լեւոն Իգիթյանը՝ «Երկիր ծիրանիի» անդամներին
Սկսվել է Երեւանի ավագանու հերթական նիստը:Ավագանին հաստատեց նիստի օրակարգը եւ ըստ սահմանված հաջորդականության սկսեց քննարկել եւ քվեարկել հարցերը: Դեմ քվեարկեցին միայն «Երկիր ծիրանի» խմբակցության երեք անդամները:Որոշում կայացվեց բնակարան նվիրել ՀՀ ժողովրդական արտիստ Ռաիսա Մկրտչյանին: Երեւանի ավագանին Ռաիսա Մկրտչյանին բնակարան նվիրելու հարցն ընդունեց 58 կողմ եւ 3 դեմ ձայնով:Մինչեւ հարցը քննարկման դնելը, ավագանու «Երկիր ծիրանի» խմբակցության անդամ Սոնա Աղեկյանը հետաքրքրվեց՝ ինչո՞ւ է բնակարան ստանում ժողովրդական արտիստը, եթե երկրում 1 միլիոն աղքատ մարդ կա: «Երկիր ծիրանիի» խմբակցության անդմաները կրկին պնդեցին բնակարան չնվիրել նրանց, ովքեր դրա կարիքը չունեն: Խմբակցությունից Մարինա Խաչատրյանը հորդորեց բնակարաններ նվիրել զոհված զինծառայողների ընտանիքներին, որոնք դրա կարիքն իսկապես ունեն: «Հանրապետական» խմբակցության անդամ Լեւոն Իգիթյանը հակադարձեց. «Ցավում եմ, որ հասել ենք այն վիճակին, որ բացարձակ արժեքն էլ ենք կասկածի տակ դնում, էս տեմպերով մենք կնմանվենք մեր կողքի ցեղերին, իսկ ես չեմ ուզում Ադրբեջանին հասնենք: Զոհված զինծառայողների ընտանիքներին մենք բազմիցս օգնել ենք, այդ մասով ավագանու որոշումներ կան, հերիք է էդքան իջնեք»:
Հետևեք մեզ Viber-ում
