Մայր Աթոռ Ս․ Էջմիածնից Ս․ Հակոբ եկեղեցի կբերվի Ս․ Հակոբ Մծբնա հայրապետի մասունքակիր խաչը

Դեկտեմբերի 13-ին Ն.Ս.Օ.Տ.Տ. Գարեգին Երկրորդ Ամենայն Հայոց Կաթողիկոսի օրհնությամբ Մայր Աթոռ Ս․ Էջմիածնից Ս․ Հակոբ եկեղեցի կբերվի Ս․ Հակոբ Մծբնա հայրապետի մասունքակիր խաչը։ Այս մասին տեղեկանում ենք Qahana.am-ից։
Ժամը 9։00-ին համայնքը թափոր կազմած Ֆանարջյան փողոցում կդիմավորի մասունքը և խաչվառներով, խնկարկումով ու շարականների երգեցողությամբ կուղեկցի եկեղեցի։ Թափորին կմասնակցեն եկեղեցական համայնքի ու թեմի երիտասարդական կառույցների անդամները, ուխտավորներ թեմի այլ համայնքներից։
Եկեղեցում կկատարվի Պահպանիչ աղոթք, ապա մասունքը կդրվի Խորանի Սուրբ Սեղանին։
Ժամը 10։30-ին կմատուցվի Սուրբ Պատարագ։ Ավարտին կկատարվի օրհնության կարգ։
Մասունքն ուխտավորների խոնարհման համար կմնա եկեղեցում մինչև ժամը 16։00-ը։