«Դաշնակցությունը փակելու մասին հայտարարություն անողները չեն պատկերացնում Դաշնակցության էությունը». Արսեն Համբարձումյան
« Հանուն հայի, հանուն պետության » կարգախոսը ոչ միայն այսօրվա ուղենշն է, այլ ամբողջությամբ արտահայտում է Դաշնակցության ավելի քան մեկդարյա պատմության էությունը»,– ՀՅԴ 135-ամյակի կապակցությամբ նշել է ՀՅԴ Բյուրոյի անդամ Արսեն Համբարձումյանը։
Նրա խոսքով՝ Դաշնակցությունը իր գոյության ամբողջ ընթացքում՝ որը արդեն երեք դարաշրջան է ընդգրկում, մշտապես պայքարել է հանուն հայ ժողովրդի և պետականության պաշտպանության։
Համբարձումյանն ընդգծել է, որ Դաշնակցության օրը տասնամյակներ շարունակ տոնվող կայացած ավանդույթ է, որը նաև լավ հնարավորություն է գնահատելու անցած ճանապարհը, արժևորելու ձեռքբերումները և նախանշելու առաջիկա անելիքները։ Նրա գնահատմամբ՝ ներկայիս բարդ ու մարտահրավերներով լի պայմաններում Դաշնակցությունն ունի լուրջ պատասխանատվություն Հայաստանի և համահայկական շրջանակների առջև և պարտավոր է իր բաժին գործը կատարել առավելագույն պատասխանատվությամբ։
Անդրադառնալով որոշ շրջանակների կողմից հնչեցվող հայտարարություններին՝ Դաշնակցությունը փակելու կամ նրա գործունեությունը սահմանափակելու վերաբերյալ, Համբարձումյանը նշել է, որ նման դիրքորոշում ունեցողները պարզապես չեն պատկերացնում Դաշնակցության էությունն ու կազմակերպական կառուցվածքը։ Նրա խոսքով՝ պատմության ընթացքում բազմիցս եղել են փորձեր՝ տարբեր պետությունների և ուժերի կողմից Դաշնակցությունը կասեցնելու, թուլացնելու կամ քաղաքական դաշտից դուրս մղելու, սակայն այդ փորձերը երբեք հաջողությամբ չեն պսակվել։
«Եթե նման հայտարարություններ անողները իսկապես հասկանային, թե ինչ է նշանակում Դաշնակցություն, նման խոսքեր իրենց թույլ չէին տա»,– ընդգծել է Համբարձումյանը։
Հետևեք մեզ Viber-ում
