Ի՞նչ բացահայտեց փաստաթղթերի հրապարակումը. Տիգրան Դումիկյան
«ՀՀ կառավարության կողմից հրապարակված՝ ԵԱՀԿ Մինսկի խմբի միջնորդությամբ ադրբեջանա-ղարաբաղյան բանակցությունների ընթացքում քննարկված փաստաթղթերի անգամ ոչ ամբողջական փաթեթը հնարավորություն տվեց հասկանալու, որ 2019թ.-ի հունիսին հակամարտության խաղաղ կարգավորման նպատակով ստացված առաջարկները Նիկոլ Փաշինյանի կառավարությունը փաստացի գաղտնի է պահել հանրությունից։
Թե որն է եղել Փաշինյանի իշխանության՝ այդ փաստաթղթերի ընտրողաբար հրապարակելու պատճառը, քննարկման այլ հարց է, բայց միայն վերջին փաստաթղթի շուրջ գործընթացի քննարկումը ցույց է տալիս, որ 2019թ.-ին Հայաստանի իշխանությունը դե ֆակտո հրաժարվել է ԵԱՀԿ Մինսկի խմբի՝ տասնամյակների ժառանգությունից՝ առաջ քաշելով սեփական մոտեցումը։ Սա հանցավոր անփութությո՞ւն էր, անխոհեմությո՞ւն, անգրագիտությո՞ւն, առավելապաշտությո՞ւն, թե՞ երկրի առջև ծառացած գերզգայուն խնդիրների նկատմամբ պատասխանատվության լիակատար բացակայություն։
Փաստորեն, պոստ ֆակտում կարող ենք արձանագրել, որ բարձր հավանականությամբ հենց այս իրավիճակն է «կանաչ լույս» վառել Ադրբեջանի համար իր ռազմական նկրտումները միջազգային գործընկերներին ներկայացնելու՝ որպես հարկադրված քայլ։ Մինչդեռ երկար տարիներ ԵԱՀԿ Մինսկի խումբը հենց իր միջնորդությամբ էր կանխում նման սրացումների՝ լայնածավալ պատերազմի վերածումը՝ զսպելով պաշտոնական Բաքվի առավելապաշտական ակնկալիքները։
Այս զարգացումներն այսօր ևս շարունակում են լուրջ մտահոգություններ առաջացնել։ Չի կարելի բացառել, որ գործող իշխանությունը խաղաղության օրակարգի շուրջ ընթացիկ բանակցությունների ընթացքում կրկին կարող է հանրությունից թաքցնել որոշ առաջարկներ կամ պայմանավորվածություններ, որոնց բացահայտումն ապագայում այլևս ոչինչ չի փոխի Հայաստանի համար անդառնալի կորուստների համապատկերին։
Ուստի՝ պետական անվտանգության վերականգնման համար կենսական անհրաժեշտություն է, որ առաջիկա համապետական ընտրություններում ժողովուրդն իր վճռորոշ քվեով կանխի պետականությանը սպառնացող վտանգավոր զարգացումները»։
Տիգրան Դումիկյան
Քաղաքական վերլուծաբան
Հետևեք մեզ Viber-ում
