Մի պայծառ անձնավորություն, միամիտ մտքեր՝ կանխված դավադրության մասին
Հայաստանում ՌԴ դեսպան Իվան Վոլինկինը նախօրեին հորդորել է լուրջ չվերաբերվել Եվրամիության հետ Համապարփակ և ընդլայնված գործընկերության համաձայնագրի ստորագրումից առաջ և հետո ռուսական հեռուստաալիքներով Հայաստանի հասցեին հնչած քննադատությանն ու մեղադրանքներին: «Ես պետք է ասեմ որ դուք ճիշտ չեք մեկնաբանում այս հարցը, որ ոչ թե ռուսական ալիքներն են քննադատել, այլ քննադատել են առանձին անհատներ, ովքեր Հայաստանի, հայ- ռուսական հարաբերությունների հետ որևէ առնչություն չունեն», - «Ազատության» հետ զրույցում նշել է դեսպանը: Հիշեցնենք, Հայաստան-Եվրամիություն նոր համաձայնագրի ստորագրման նախօրեին Ռուսաստանի պաշտպանության նախարարության «Զվեզդա» հեռուստաալիքի եթերում հաղորդավարը հայտարարել էր՝ «Եվրամիության հետ ասոցացումը միակ բանը չէ, ինչ Հայաստանն անում է՝ ինչպես Ուկրաինան։ Երևանը նույնպես հերոսացնում է ֆաշիզմի աջակիցներին»: Այնուհետև նա Գարեգին Նժդեհին համեմատել էր ուկրաինական ազգայնականության գաղափարախոս Ստեփան Բանդերայի, իսկ Հայաստանի իշխող Հանրապետական կուսակցության խորհրդանշանը՝ Ֆաշիստական Գերմանիայի զինանշանի հետ։ Երկու օր անց, սակայն, Ռուսաստանի Դաշնությունում Հայաստանի դեսպանին հղած նամակում հեռուստաալիքը պաշտոնապես ներողություն էր հայցել թույլ տված սխալի համար։ Համաձայնագրի ստորագրումից հետո էլ ռուսական НТВ հեռուստաընկերության «Հանդիպման վայրը» ծրագրի թողարկումներից մեկում ռուսաստանցի վերլուծաբաններն ու քաղաքագետները վիրավորական մեկնաբանություններ էին արել Հայաստանի հասցեին՝ երկիրը համեմատելով ամուսնացած կնոջ հետ, որը որոշել է սիրավեպ սկսել մեկ ուրիշ տղամարդու հետ: «Դրանք մարդիկ են, ովքեր մասնագետներ են, փորձագետներ են, քաղաքագետներ, բայց նրանք զբաղվում են, այսպես ասած, այլ հարցերով, իսկ հայ - ռուսական հարաբերությունները նրանց մասնագիտացումը չէ», ասել է դեսպանը: - «Ես, օրինակ, չէի մեկնաբանի փականագործի ու խառատի աշխատանքը, որովհետև ես այդ մասին ոչինչ չգիտեմ և չեմ հասկանում: Իսկ այն, ինչ նրանք մեկնաբանել են, դա իրենց իրավասությունը չէ, և պետք չէ դրան լուրջ վերաբերվել»: Պաշտոնական Մոսկվան, ակնհայտորեն, փորձում է մեղմել այն դժգոհությունը, որը բարձրացավ թե՛ ՀՀ-ԵՄ համաձայնագրի ստորագրումից առաջ, թե՛ դրանից հետո: Սա իհարկե, դրական փաստ է: Նշանակում է, Մոսկվայում, գոնե, պաշտոնական մակարդակում գիտակցել են, որ կրակի վրա բենզին լցնել չարժե: Բայց դեսպանն, ակնհայտորեն, ասում է բաներ, որոնց հավատալու համար, մեղմ ասած՝ պետք է չափազանց միամիտ լինել: Այսինքն, ռուսական եթերում կարող են հայտնվել հաղորդումներ՝ առանց «վերևների» իմացությա՞ն... Մի՞թե այդ աստիճան «ազատատենչ» է դարձել ռուսական մեդիան, այն էլ՝ հեռուստամեդիան: Հարգարժան դեսպանը՝ ռուսական ցինիզմը փրկելու ճանապարհին, իհարկե, ինչպես ասում են, սահմաններն էլ է անցնում, բայց միայն փաստը, որ Հայաստանում Ռուսաստանի դեսպանով էլ պատրաստ են խորհուրդ տալ ուշադրություն չդարձնել ռուսական եթերից թափվող «աղբին»՝ արդեն պերճախոս վկայություն է այն բանի, թե ինչպիսի ցինիկների հետ կարող ենք գործ ունենալ: Այնպես որ, շնորհակալություն պարոն դեսպանին՝ անկեղծության համար: Թամար Բագրատունի
Հետևեք մեզ Viber-ում
