Էրդողան. Չեմ հավատում
RIA Novosti լրատվական գործակալության փոխանցմամբ՝ Նիգերիայում գտնվող Թուրքիայի նախագահ Ռեջեփ Էրդողանը լրագրողների հետ զրույցում «ահաբեկչությանը հարելու հրավեր» է որակել քրդամետ «Ժողովուրդների դեմոկրատական» կուսակցության (ԺԴԿ) համանախագահ Սելահաթին Դեմիրթաշի կողմից Դիարբեքիրում հակառազմական երթ անելու կոչը։ Ավելի վաղ, Դեմիրթաշն իր համակիրներին կոչ էր արել դուրս գալ բողոքի երթի՝ ընդդեմ Դիարբեքիրում «հակաահաբեկչական գործողության» անցկացման և շարժվել Սուր շրջանի ուղղությամբ, որտեղ երկու ամսից ավելի է, ինչ գործում է պարետային ժամ և շարունակվում են բախումները։ Թուրքիայի ներքին գործերի նախարար Էֆքան Ալան «սադրանք» է որակել Դեմիրթաշի կոչը, իսկ Դիարբեքիրի նահանգապետի աշխատակազմը հայտարարել է այդ ակցիան արգելելու մասին՝ ընդգծելով, որ պատրաստ է միջոցներ ձեռնարկել հասարակական կարգի ու անվտանգության խախտումների դեմ։ Էրդողանը հայտարարել է. «Չեմ հավատում, թե իմ քուրդ եղբայրները կարձագանքեն այդ կոչին, որը հիշեցնում է ահաբեկչությանը հարելու հրավեր։ Կարծում եմ, որ դատախազները կկատարեն այն, ինչը պետք է անեն։ Ոչ ոք իրավունք չունի խախտել մեր երկրի անդորրը»։
Հետևեք մեզ Viber-ում
