Շփման գծում սրացումների մեղավորը Ադրբեջանն է. Արմեն Աշոտյան

Դեկտեմբերի 22-ին լրագրողների հետ հանդիպման ժամանակ նման կարծիք հայնեց  ՀՀ Ազգային ժողովի արտաքին հարաբերությունների մշտական հանձնաժողովի նախագահ, Հայաստանի իշխող Հանրապետական կուսակցության փոխնախագահ Արմեն Աշոտյանը նշեց, որ 2017 թվականի առաջին կեսը տարբերվում էր շփման գծում իրավիճակի սրման բազմաթիվ դեպքերով, սադրանքներով, որոնք մարդկային կորուստների են հանգեցրել: Ինչպես ասաց՝ ղարաբաղյան հակամարտության կարգավորման հարցում անհրաժեշտ է զգոն լինել, քանի որ շփման գծում լարվածության անկումը պայմանավորված չէ ԵԱՀԿ Մինսկի խմբի համանախագահների ներկայացրած առաջարկներով, որոնց հետ հակամարտության երկու կողմերն էլ համաձայն էին, ինչպես նաև կապված չէ դիտորդական գործառույթների ընդլայնման, հրադադարի ռեժիմի խախտումների հետաքննության մեխանիզմների ներդրման հետ: «Լարվածության անկումը կամ թուլացումը կարող ենք կապել բացառապես Ադրբեջանի ռազմաքաղաքական ղեկավարության «բարի կամքի» կամ անձնական որոշման հետ: Շփման գծում սրացումների մեղավորը Ադրբեջանն է: Բարի կամքը կարևոր է, բայց դա պետք է լինի ավելին, քան տեսանելի ժամանակահատվածում լարվածության թուլացումն է։ Բարի կամքը պետք է դրսևորվի նաև ստանձնած պարտավորությունների կատարման քաղաքական որոշման մեջ։ Արցախյան հակամարտության կարգավորման գործընթացը շատ է կախված անձից։ 2018-ի ընթացքում լավագույն ակնկալիքը, որ մենք կարող ենք ունենալ ՀՀ-ում և Արցախում՝ Վիեննայում և Սանկտ Պետերբուրգում ձեռք բերված պայմանավորվածությունների լիարժեք կատարումն է, վստահության մթնոլորտի ձևավորումը, բանակցային միջավայրի բարելավումը, և այս ընթացքում նաև բարձր մակարդակի կոնտակտները կարող են լինել էֆեկտիվ»,- նկատեց նա։