Տիգրան Աբրահամյան․ Դատաիրավական համակարգը Հայաստանում իրականացնում է քաղաքական հանձնարարություններ

ԱԺ պատգամավոր Տիգրան Աբրահամյանի գնահատմամբ՝ Վազգեն Սաղաթելյանի և Նարեկ Սամսոնյանի կալանավորումն ունի քաղաքական ենթատեքստ։

«Մեր երկրում դատաիրավական համակարգը կատարում է քաղաքական հանձնարարություններ։ Սա արդեն երկրորդ դեպքն է, երբ Վազգեն Սաղաթելյանն ու Նարեկ Սամսոնյանը իրենց ընդդիմադիր հայացքները արտահայտելու համար անցնում են քրեական գործով։ Իշխանությունն ակտիվ քաղաքացիների ցուցակ է ստեղծել, և երբ նրանց արտահայտած մտքերն իշխանությանը դուր չեն գալիս, նրանց ազատությունը սահմանափակվում է», – նշել է Տիգրան Աբրահամյանը։

Ինչպես արդեն հայտնել ենք՝ այսօր վաղ առավոտյան դիմակավորված իրավապահները մուտք են գործել Նարեկ Սամսոնյանի եւ Վազգեն Սաղաթելյանի բնակության վայրեր ու նրանց ձերբակալել՝ մասկի շոուի բեմադրմամբ։ Նրանց մեղադրանք է առաջադրվել իրենց հրապարակային խոսքի համար՝ ՀՀ քրեական օրենսգրքի 297-րդ հոդվածի 2-րդ մասով՝ տեղեկատվական կամ հաղորդակցական տեխնոլոգիաներ օգտագործելով խուլիգանություն կատարելու համար։

Ընդ որում՝ փոդքասթի համահեղինակների նկատմամբ վարույթը հարուցվել է ԱԺ նախագահ Ալեն Սիմոնյանի հաղորդման հիման վրա, որը նրանց հրապարակավ անվանել էր «Շան լակոտներ» եւ տղաներն էլ արձագանքել էին։ Նշված վիրավորական արտահայտության համար ԱԺ նախագահի դեմ քրեական վարույթ չի նախաձեռնվել՝ համացանցային խուլիգանության հատկանիշներով։

Նախաքննական մարմինը նրանց կալանավորելու միջնորդություն է ներկայացրել. Նարեկ Սամսոնյանի կալանքի հարցը քննարկվում է Երեւանի ընդհանուր իրավասության դատարանի Նոր Նորք նստավայրում՝ դատավոր Մասիս Մելքոնյանի նախագահությամբ, իսկ Վազգեն Սաղաթելյանինը՝ Աջափնյակի նստավայրում, դատավոր Ռոման Սմբատյանի նախագահությամբ։

Աղբյուր՝ Փաստինֆո