«Կարող է, օրինակ, իր գովերգած նոր գնված զինտեխնիկայով սկսել գնդակոծել մեր գրասենյակները. Ամեն ինչ էլ կարող է անել. Գեղամ Մանուկյան

Իրականում վաղուց է օդում շրջանառվում Դաշնակցությունը փակելու թեման։ Ավելին՝ մի քանի անգամ Նիկոլ Փաշինյանը իր հրապարակային ելույթներում էլ ակնարկել է այդ մասին։ Այս մասին «Փաստինֆո»-ի հետ զրույցում ասաց «Հայաստան» խմբակցության պատգամավոր Գեղամ Մանուկյանը՝ անդրադառնալով Փաշինյանի հայտարարությանը, թե Ռոբերտ Քոչարյանի և Սերժ Սարգսյանի առաջնորդած ուժերը չպետք է լինեն խորհրդարանում, քանի որ նրանց մեջ կան այլ երկրների ազդեցության գործակալներ։

Ավելին, նա ավելի է մասնավորեցրել ու նշել, թե վերջին 70 տարում դաշնակցությունը եղել է այլ երկրի ազդեցության գործակալն ամբողջ աշխարհում։
«Հիմա արդեն դրա համար կա վառ օրինակ՝ Մոլդովայի դառը փորձը։ Իրականում, այս իշխանության օրոք ամեն ինչ հնարավոր է․ եթե կարող են ուղղակի օդից մարդկանց ձերբակալել, կալանքի տակ պահել և ամիսներով բանտում թողնել՝ առանց որևէ հիմքի, ապա չի բացառվում, որ նման անօրինականության էլ դիմեն։
Ինչ վերաբերում է «ազդեցության գործակալների» վերաբերյալ այսօրվա հայտարարությանը՝ ես Ազգային ժողովի ամբիոնից ստիպված օգտագործեցի ռուսերեն «безотчётник» բառը, երբ մարդը օդի մեջ ինչ-որ բան է «կրակում», բայց դրա համար պատասխանատվություն չի կրում։

Ամիսներ առաջ Փաշինյանը նման մեղադրանքներ ևս հնչեցրել էր։ Ես Ազգային անվտանգության ծառայություն հաղորդում էի ներկայացրել հանցագործության մասին՝ պահանջելով, որ եթե Փաշինյանի խոսքերը հիմնավոր են, ապա հարուցեն քրեական գործ։ ԱԱԾ-ն այն ուղարկել էր Քննչական կոմիտե, իսկ այնտեղից պատասխան եկավ, որ գործ հարուցելու հիմքեր չկան։ Այսինքն՝ անգամ Քննչական կոմիտեն փաստացի արձանագրեց, որ Փաշինյանի խոսքերը բանի տեղ չդնենք, քանի որ նա սովոր է հիմնազուրկ հայտարարություններ անել։

Դիտարկմանը, թե արդյո՞ք իր համար նույնպես ակնհայտ է, որ ընտրություններից առաջ կուսակցություններ փակելը Փաշինյանի համար վերընտրվելու կամ իշխանությունը պահելու միակ ճանապարհն է, Մանուկյանը պատասխանեց․

«Շատ այլ ճանապարհներ էլ կարող են լինել․ կարող է սկսել գնդակահարել մեզ, կարող է տասնյակներով կամ հարյուրներով ձերբակալել։ Կարող է, օրինակ, իր գովերգած նոր գնված զինտեխնիկայով սկսել գնդակոծել մեր գրասենյակները։ Ամեն ինչ էլ կարող է անել»,- նշեց պատգամավորը։