ՀՅԴ-ն առաջ անցավ ԵԼՔ-ից. կրկին ընդմիջում

ՀՅԴ խմբակցության քարտուղար Աղվան Վարդանյանը կանխեց ԱԺ-ում քվեարկության ժամանակ «Ելք»-ի կողմից հայտարարվելիք 11-րդ ընդմիջումը։ Նախքան վարման կարգով ելույթ կունենար «Ելք» խմբակցության ղեկավար Նիկոլ Փաշինյանը և կհայտարարեր 20 րոպե ընդմիջում վերցնելու մասին, Աղվան Վարդանյանն առաջ անցավ՝ ասելով. «Օգտվելով ԱԺ կանոնակարգի 63-րդ հոդվածի 3-րդ կետից՝ ՀՅԴ-ն 20 րոպե ընդմիջում է վերցնում»։ Այնուհետև լրագրողների հետ զրույցում Վարդանյանը հայտարարեց, որ ընդամենը օգտվել են իրենց կանոնակարգային իրավունքից. «Ոչ ոքի դեմ չէ, կանոնակարգ օրենքի` մեզ ընձեռած իրավունքից ենք օգտվել ընդամենը»: Հարցին` դա ռազմավարական նշանակություն ունե՞ր, Վարդանյանը պատասխանեց. «Մարտավարական»:   Հիշեցնենք, որ այսօր առավոտից «Ելք»-ը 10-ն անգամ 20 րոպեանոց ընդմիջում է վերցրել՝ ձգձգելով ԱԺ օրինագծերի քվեարկությունը։ Սա վերջին ընդմիջումն էր։ Քվեարկությունից հետո ԱԺ արտահերթ նիստը կավարտվի։