Զոքանչի հինն է լավ․․․
ՔՊ-ական պատգամավոր Կարեն Սարուխանյանն օրեր առաջ ասում էր՝ Գյումրու քաղաքապետարանը Վարդանիկի կլանն է, և սիրելի գյումրեցիներից պահանջում էր.
«Գյումրու համայնքապետարանը պե՜տք է ազատագրենք այս հայտնի կլանից»։
Ազատագրական պայքարից հետո, երբ շատերին ձերբակալեցին, պարզվեց՝ տնային կալանքի մեջ է նաև պատգամավորի զոքանչ մայրիկը։ Պատկերացնու՞մ եք՝ ինչ անհարմար իրավիճակում է հայտնվել մարդը․ զոքանչը տնային կալանքի տակ, ինքը՝ քաղաքական կրակի կենտրոնում։
Հետևում ես նրա հակասական բացատրություններին ու չես հասկանում՝ այս մարդը չի՞ տեսնում, որ սեփական զոքանչն էլ է ՔՊ-ին դեմ։ Իհարկե տեսնում է։ Լավ էլ հասկանում է, որ իշխանական կառույցների ներսում լարվածությունն արդեն ընտանեկան բնույթ է կրում, և չի բացառվում, որ ինքը «զոքանից ավելի՜ զոքանչ է», բայց դե՝ զոքանչը մի քիչ շտապեց։
Ի վերջո ի՞նչ է արել զոքանչ մայրիկը։ Պարզվում է՝ Վարդան Ղուկասյանին ձերբակալելու օպերացիայից առաջ զանգել է մանկապարտեզներին՝ կոչ անելով գործադուլ անել։ Փաստորեն՝ ցանկացել է փրկել Վարդան Ղուկասյանին։
Պատգամավորը կարող էր տղամարդավարի ասել՝ «դե ես ի՞նչ անեմ, զոքանչս Նիկոլին դեմ է, սկզբունքային կին է»։ Բայց նա այլ ճանապարհ ընտրեց՝ վախենալով, որ իր գլխից մի մազ պակասի։ Ասում է՝ զոքանչին ստիպել են զանգել, չի դիմացել, չի հասկացել, չէր ուզում, բայց զանգել է։
Լրատվամիջոցներին էլ համոզում է, թե զոքանչը հին ՔՊ-ական է, իրավիճակի զոհ։ Հրապարակ-ին ասում է՝«մինչեւ հեղափոխությունը, երբ մենք ընդդիմություն էինք, այդ ժամանակվանից էր ինքը ՔՊ կուսակցության անդամ»։
Պատգամավորը, երևի լսելով, որ «գինու հինն է լավ», որոշել է նույնը տարածել զոքանչի վրա՝ հույսով, թե Նիկոլ Փաշինյանը կասի. «Զոքանչի հինն էլ է լավ»։
Բայց մոռացել է, որ Նիկոլ Փաշինյանը իշխանության գալուց հետո բոլոր հին գինիները բացեց ու թթվեցրեց հենց իր վրա։ Իսկ գինին, ինչպես զոքանչը, երբ երկար է ,, պճպճում,, , սկսում է եռալ՝ և օգտագործման պահին խցանը կարող է թռչել ուղիղ օգտագործողի աչքին։
Փեսան պիտի իմանար, որ Հայաստանում ոչ մի բանը չի թթվում այնպես արագ, ինչպես հին կուսակցական զոքանչի հավատարմությունը։
Հասմիկ Բաբաջանյան
«Հրապարակ օրաթերթ»
Հետևեք մեզ Viber-ում
