Դատավորները պետք է ունենան ֆինանսական անկախության երաշխիք. պնդում է Կոստանյանը

ԱԺ-ում այսօր քննարկվում էր «Դատական օրենսգիրք» սահմանադրական նախագիծը, որը զեկուցեց արդարադատության նախարար Դավիթ Հարությունյանը: Նա ասաց, որ սահմանված է դատավորի վարքագծի կանոն, որ իր գործունեության միջամտության ցանկացած փորձի մասին պետք է դատավորը բարձրաձայնի Բարձրագույն դատական խորհրդում, ով ճնշում է գործադրի դատարանի որոշման վրա, պետք է պատասխանատվության ենթարկվի: Ինչպես տեղեկացրել է՝ դատավորը պետք է հանդես գա հայտարարությամբ, որպեսզի ողջ հանրությունն իմանա, թե ինչ է տեղի ունենում: Դատարանների նախագահների խորհուրդը վերացվում է, Բարձրագույն դատական խորհուրդն է ապահովելու դատական իշխանության անկախությունը: Էապես փոխվել են դատարանի նախագահի լիազորությունները եւ դատավորը ավելի անկախ է դարձել դատարանի նախագահից: Հարակից զեկուցող, նախկին գլխավոր դատախազ Գեւորգ Կոստանյանը վստահեցրեց, որ այս օրենսգիրքն արդարադատության որակը երկրում կբարձրացնի, և որ այս Դատական օրենսգիրքը ունակ է շտկել մեր հասարակության վերաբերմունքը դատական համակարգի նկատմամբ: Անդրադառնալով ՄԻԵԴ-ի կայացրած որոշումների կոնտեքստում դատավորներին պատասխանատվության  ենթարկելու հարցին՝ Կոստանյանն ասել է. «Բարեբախտաբար թե դժբախտաբար, դատավորներին ֆինանսական պատասխանատվության ենթարկելու ինստիտուտը բացակայում է: Դատավորները պետք է ունենան ֆինանսական անկախության երաշխիք: ՄԻԵԴ-ի վճիռը պետք է հիմք հանդիսանա դատավորների նկատմամբ կարգապահական վարույթ սկսելու համար»: Գեւորգ Կոստանյանը հստակեցրել է, որ դատավորներին պատասխանատվության ենթարկելու հիմքերն են հստակեցվել, թե որն է կոպիտ, էական խախտումը: