Եւ այս մարդը կարծում է, թե՝ հայ ժողովրդին լավ է ճանաչում․․․ինչո՞ւ է Նիկոլ Փաշինյանն այսքան հաճախ մեկնում արտերկիր

Ոմանք զարմանում են՝ ինչո՞ւ է Նիկոլ Փաշինյանն այսքան հաճախ մեկնում արտերկիր․ մեկ ինչ -որ գագաթնաժողովի, մեկ՝ քննարկման․ մեկ՝ ԱՄՆ, հետո՝ Ռուսաստան ու Չինաստան, Եւրոպա եւ անգամ՝ Եգիպտոս ու Տաջիկստան։ Վերջին 1 ամսվա ընթացքում հասցրել է լինել Բրյուսելում, Վատիկանում, Կոպենհագենում, Թբիլիսիում, այս օրերին էլ Փարիզում է։ Մի՞թե ուղղակի աշխարհ տեսնելու, շրջագայելու, հանգստանալու կարիք ունի, գուցե՝ նյարդերը հանգստացնելու․․․ Բայց չէ՞ որ այս ամռանն աննախադեպ երկար՝ ուղիղ մեկ ամիս արձակուրդում էր եւ 2 ամսվա ընթացքում դժվար թե հասցրած լինի այդքան հոգնել, որ բյուջեի հաշվին նման շրջագայություններով փորձի հանգստանալ։ Ի վերջո՝ ո՞վ պետք է հայաստանյան կառավարման համակարգը ղեկավարի, (ասում էր չէ՞․ կառավարությունը ես եմ) եթե ինքը Հայաստանում ավելի քիչ ժամանակ է անցկացնում, քան դրսերում։ Մանավանդ որ Հայաստանում եղած օրերի մի մասն էլ զբաղված է ապօրինի պատարագների մասնակցելով, հակաեկեղեցական պայքարն առաջնորդելով, ռիլեր նկարելով, անգամ նորաձեւության ցուցադրությունների մասնակցելով։
Պատասխանը շատ պարզ է՝ նրան, գուցե՝ իր քաղտեխնոլոգներին, թվում է, թե այս ուղեւորությունները եւ տարբեր երկրների ղեկավարների հետ լուսանկարվելը կարող է բարձրացնել իր գահավիժած ռեյտինգը, մարդկանց ներշնչել, որ ինքն ընդունված է աշխարհի տարբեր անկյուններում, տարբեր բարձրաստիճան պաշտոնյաների կողմից եւ հայ ժողովուրդն էլ կզարմանա ու կհաշտվի ՔՊ-ի՝ առաջիկա վերարտադրության հետ։ Նրան թվում է, որ եթե մի օր Թրամփի հետ լուսանկարվի, մյուս օրը՝ Պուտինի, Էմանուել Մակրոնն էլ մի հանդիպման ընթացքում 5 անգամ գրկախառնվի եւ դա 200 տարբեր պոզաներով լուսանկարեն ու տարածեն, 2026-ին հաղթելը կհեշտանա եւ վարկաբեկված, ձախողված, երկրի կառավարումը տապալած, այսքան աղետ հայ ժողովրդին բերած ՔՊ-ին մարդիկ քվե կտան․․․
Եւ այս մարդը կարծում է, թե՝ հայ ժողովրդին լավ է ճանաչում․․․

Այս մասին գրել է Հրապարակ օրաթերթի խմբագիր Արմինե Օհանյանը